My little detour - 《晨早的行程深造課》

咦， 琴晚又瞓得幾好喎， 終於無零晨4 點幾起身。 最後8點幾離開張床去食早餐。 我一個箭步標左入廚房， 以為自助形式， 其實原來我係搞住左人地。人哋個routine係你話佢知要咩， 佢再預備比你。 其實選擇唔多， 有多士同幾款水果包括哈蜜瓜、菠蘿、橙同埋香蕉， 再加多杯齋啡。

食完又唔趕時間， 我又繼續坐多陣先洗碗。呢個時候又撞到natalia, 今次問埋佢recommend bacalar的hostel位置， 安心晒。 不過我好似係booking.com搵到間仲平， 但我想開左電話卡先book。 

洗完碗又繼續係lobby張吊床hea, 點知突然落垉滂沱大雨， 咁更加唔使出去囉。

之後同下格床的阿根廷女仔吹左陣水。 yeah！又有人介紹我阿根廷有咩地方要去了。 佢返房再瞓之後， 到hostel經理走過嚟問下我點， 佢問我之後去邊， 我話其實我無全盤計劃的， 因為我無咩搵資料， 心目中嘅路程係由北到南， 能去幾遠就走幾遠，一切隨心而行。 咁佢好好， 係咁話比我知Mexico邊到值得去， 邊到有咩特別， 仲幫我諗埋條路線， 嘩！ 好人到爆。 而我都唔可以太懶， 等我study下的地方再取捨先。但佢都同我講， 薩爾亞多其實好危險， 佢嗰的gang唔係一細群， 係一大群好有組織的， 頭上面仲紋左唔知13定18， 佢話如果係佢個妹， 佢唔比佢去。其實我真係好衷心多謝佢比左咁多資訊我呢！

整埋食埋個lunch後， 等到停雨先出去。首要任務係買電話卡同睇下collectivo有無車去Tulum。 聽hostel職員講walmart有得賣電話卡， 但係今日休息喎😳。 咁都無法， 唯有行去睇collectivo 啦， 點知行去期間又見到電訊公司...不過都係休息。

之後再去collectivo, yeah, 5am-11pm有車去tulum, 客滿即走， 45peso single way。

完成任務， 諗住都係行下應該會靚d嘅沙灘。但大風大浪咩心機都無，所以都係周圍亂行。 原來呢到勁多大型商場， 無野做都行下囉。 有billabong, 有old navy, 又有名店。我係條遊客街同各大商場行嚟行去， 之後就返hostel，竟然咁都行到5點幾。

之後諗住再出去超巿睇下有咩買就返去整野食， 點知又比我行到一間平民食肆， 見到人地飲湯我又好恨飲， 所以問左姐姐人地食緊嗰的係咩幾錢後就坐低等食。 佢跟餐有杯似山渣茶嘅凍飲、雞湯、 taco同飯，不過對我嚟講個雞就幾咸囉（60 peso)。

食飽我就去超巿睇下有無野買， 其實只係需要買返枝水， 因為對我嚟講頭先嗰餐已經係晚餐的上半場。 但我行walmart期間竟然睇中頂帽， 我來來回回攞起又放低， 因為其實幾靚， 但可以遮住我難搞的前蔭， 同埋98peso可以接受。 但最後諗到自己其實都有cap帽同行山帽， 有無需要多頂草帽呢...最後都係算了， 免得攞多樣野。

之後返到去再望返Ado巴士班次cap圖， 其實ado巴士的價錢因應班次有調整， 而11:51有班車係43 peso平過collectivo, 而且仲有得係tulum zona arq落， 好似較近我hostel, 所以我就決定買呢班車。 雖然到現場買變左48peso， 但5 peso可以近d舒服d係好超值的。 

就咁完成晒所有任務後， 我就返去整野食了。 

已用：312.5 peso

60 peso 雞湯

5.5 peso 水

48 peso Ado bus to tulum