恐龍終歸成化石

早幾日因航決定大改組，並且將我經常講笑叫做恐龍航空嘅港龍即時停止營運。作為曾經嘅港龍常客，都只可以講句不勝唏噓。

話說當年工作關係，被派駐上海做專案，還好每兩星期都可以飛返香港一次。身為香港人，當然揀返間香港嘅航空公司坐。再講，當年上海航線經常有原因不明嘅延誤（註），搭咩航空公司都係要等，咁梗係揀間有好嘢食㗎啦！事實上，當年飛上海，飛機餐最好食嘅，一定係港龍。有啱香港人口味嘅飯麵，同埋蝦筋大師雪糕，就算包小食花生都好食啲，真係一上飛機就好似返咗香港咁。記得有次因事要改坐國航經深圳返香港，嗰個餐除咗麻麻地之外，小食係一包榨菜……我真係食唔慣。當然仲要提一提嗰陣嘅港龍空姐制服係最靚嘅！

知道自己有一段時間會來回飛上海做嘢，梗係要加入港龍嘅飛行常客計劃。港龍畀因航收購之前，佢有自己嘅飛行常客計劃，叫做「尊萃會」(The Elite)。講真，個人認為呢個名好聽過因航個馬可孛羅會（大家唔覺得馬可孛羅有啲繑口嘅咩？），又畀到我扮下精英(elite)咁。當年坐下坐下，就由紅卡升到做藍卡。可惜上海專案只係做咗兩年左右，趕唔切升上金卡，無得參觀下港龍自家嘅貴賓室。

嗰陣我仲申請埋張港龍信用卡，印象中係簽賬儲分可以轉港龍里數。後尾同當時女友（宜家老婆）第一次正式去旅行去避暑山莊同清東陵，唔記得係咪有用呢張卡幫手儲到里數換機票，總之嗰次旅行我哋都係坐港龍啦……我都算係擁躉啦啩？呢張信用卡都算係短命嘅，因為我記得第一張卡未到期星展就話要轉返做星展自家信用卡嘞（當然可能係我申請得遲）。

之後轉到宜家間公司做，每次北上都係二話不說就揀港龍，話之佢機票係貴啲。不過叫咗做因航港龍之後，雖然服務依然有返咁上下，但係就好似只有軀殼無咗靈魂咁。畢竟港龍已經變咗因航嘅附庸，感覺上就係低咗一等。

近年因航正如方向報所講咁管理不善，炒燶期油之餘，又因為討好強國而失民心。得意在討好完又唔見政府主動畀援助（人哋美帝都傾緊援助航空業嘅方案啦），結果要犧牲港龍，真係賠了夫人又折兵……

港龍航空就係咁突然由香港航空史上消失，剩低就只有回憶。點都好，喺度講聲：「多謝港龍！」

（註：記得嗰陣有人話係解放軍航空管制，所以成日延誤。但係隻五筒叫咗咁多年都無食出，如果真係呢個原因而延誤，咁真係好唔抵呀！）