關於牧養青少年的123事

我過去10年一直集中牧養大學生至初職的青年人，點知來到愛丁堡變成左主力做高小至中學的青少年，老實說，呢個階段的青少年性格和成長上係最難做牧養的。

因為Alpha（啟發課程 ）的方便，暫時大約有二十個以下的青少年人準備完成Alpha之後跟手接住開青少年崇拜同相關牧養事工，我知道，冇可能唔改變下傳統一直失效的青少年事工方法，所以不如推倒重來，不如重新開始。

呢幾個月同啲青少年人傾咗好多計，聽到好多佢哋心底裏面嘅說話，原來有幾樣野係我哋大人一直誤會左佢地：

1. 對教會印象唔好唔等於佢地對耶穌印象唔好；

2. 聽道教導時覺得悶唔等於佢地唔渴望有精彩有力的講道和教導；

3. 返教會覺得無聊唔等於佢地覺得基督信仰很無聊；

4. 唔睇聖經唔等於佢地唔想明白聖經；

5.態度衰衰格格唔等於佢地真係咁衰衰格格；

有一日我問d青少年，「如果耶穌而家係你面前，你有咩關於聖經的問題想問下佢？」其中一個高小的妹妹好直接咁答：「耶穌點解你唔整到d聖經容易明白啲嘅，我哋想睇都睇唔明呀！」

這番話，我一直記在心中。

青少年人唔能夠明白聖經，一定係牧者的責任，至少，我地有責任想盡辦法令佢哋唔好被拒諸門外，點都要從青少年人的角度出發。

暫時來講，我會試下用我這幾年做得比較有果效的一些實驗項目來放在這群大約10-16的青少年人身上，如果有成效可以具體咁樣分享比大家交流交流下：

1.用整卷約翰一書做門徒訓練

2.用約翰福音做處境角色扮演講道現場

3.用網絡媒體思維做當下青少年人信仰對話反思

4.用遊戲化（Gamification）做整個生命成長設計藍圖

5.提早認識聖靈和聖靈的工作

這種新方法難度是大的，不過感恩教會群體是新的，沒有所有香港教會傳統的任何包袱，最重要係，連跑數增長的包袱也沒有下，我諗，我哋應該可以走出另一條路來。

求主帶領，求主叫青少年人在真理中成長。

誠心所願。