趣香佳譯｜估唔到你係翻譯喎（粵語篇）

#估唔到你係翻譯喎#系列又返嚟喇～ 上次介紹過幾個「不為人知」嘅翻譯，有啲源自日文、梵文，有啲就同宗教有關，今次就介紹幾個「（我）估佢唔到」嘅粵語外來詞。（戴返頭盔先，可能得我唔知XD）

19世紀，粵語好多外來詞都源自英文。翻譯過程中，除咗大家最熟悉嘅音譯，有啲譯詞採用「譯音兼釋意」嘅方式兼顧音義，再勁啲仲可以選用本身啱意思嘅字跟手譯埋個音，「讀則音近，拆則可解」，簡直神乎其技，完全睇唔出佢係翻譯。（再次戴頭盔：其實會唔會得我睇唔出(Ｔ▽Ｔ) ）

1️⃣ 吉列 Cutlet

準確嚟講，其實係估唔到佢係「英文翻譯」。可能因為每次見到「吉列」就會諗起日式料理，所以從來無諗過佢原來音譯自英文「cutlet」。「cutlet」源自法文「cotelette」，意思係「肉片、肉排」。

至於「吉列」點樣由西方料理嘅「肉片」，變成日式料理嘅代表作，中間原來都有段故。話說，日本人以前係唔食肉的，佢哋覺得食用獸肉係「不潔的飲食習慣」，只會從魚肉攝取肉質。直到明治時期，天皇為咗要國人身體好似西方人咁強壯，從而令日本躋身「先進國家之林」，於是開始提倡食肉。但日本人唔習慣食肉，更加唔習慣西方人嘅飲食方式，西洋料理店「煉瓦亭」就根據日本人口味調整烹調「cutlet」嘅方式，用天婦羅深油炸代替西方料理嘅淺油煎，將「吉列牛肉」改為「吉列豬排」，配菜由麵包、薯菜改為白飯、甘藍，為咗方便日本人用筷子食飯，更將豬排事先切好再上碟。就係咁，「日式吉列豬排」就誕生喇。

漸漸「吉列」就演變為指代食材蘸麵包糠油炸的烹飪方式，出現咗「吉列蝦」「吉列蠔」嘅講法。

2️⃣ 波（球）Ball

識咗呢個字咁多年，唔知點解從來無將佢同「ball」聯想埋一齊（係我錯了T.T）。特別嘅係，「ball」最初其實譯作「波球」，正正就用咗「譯音+釋意」嘅方式，以「波」音譯「ball」，再附加「球」字說明類別，以解釋其意。後尾用多咗，就省略為純音譯詞「波」。而「打波」呢個講法，亦早喺1828年已經出現，漸漸就無人再講「波球」嚕。

3️⃣ 芒果 Mango

根據《Vocabulary of the Canton Dialect》，「芒果」 曾寫作「𣙷菓」，音譯自「mango」。當中「𣙷」譯音，「菓」則身兼二職，既可表聲「go」，又可表意「水菓」。呢種方法將外來語同譯入語完美融合，除咗要靠譯者深厚嘅文字功力（唔識多啲字點諗到邊個字啱用呢），唔多唔少都需要少少運氣（又要啱音又要啱意思喎）。

4️⃣ 拗撬 Argue

好多人認為「拗撬」音譯自「argue」，聽落又真係幾似（第一次聽嗰時都有啲震驚，估唔到呢個講得咁順口嘅廣東話詞，原來都係外來詞）。但網上亦流傳另一種說法，認為「拗撬」本身就係廣東話，並非音譯而來。1933年出版的《廣東俗語考》載有「拗撬」的解釋：「『撟』讀若轎。執拗曰拗撟。如撟馬脚。阻止之意。」更引「倉頡篇」、「荀子」中語句作例。而粵語「拗」本身也有「反抗、爭執」之意，例如「拗頸」。所以，究竟「拗撬」本身就係廣東話，定咁啱有大師諗到可以用「拗撬」譯「argue」，啱音又啱意思呢？似乎都未有定論～ 如果你哋有更多情報，不妨留言同大家分享吓！

【傳送門】 💬

張洪年（2021年），《香港粵語：二百年滄桑探索》

胡川安（2014年10月7日），日式豬排飯的小歷史
梁雅婷（2017年5月28日），【明周文化】天婦羅、唐揚、吉列：日式油炸三種滋味

我講（香港）廣東話Facebook Page（2020年9月29日）

==========

人二譯社｜InBetween Translators’ Collaborative 🏠👯‍♀️

Translation | Transcription｜Proofreading｜Reviewing | Copyediting｜Copywriting | Typesetting

.

Enquiries ✉️: inbetween.trans@gmail.com

Follow us on Instagram ✨: @inbetween.trans