電影 - Happyend - 青春末世物語

那年我們幹過最荒唐的事。

自從安田講堂全共鬥時代過咗後，日本嘅大規模學生運動好似已經冇再出現過，或者仲有零星運動，不過大家多數都躺平啦。與其話電影講嘅係近未來，不如話係講咗一啲隱藏咗喺社會入邊嘅炸彈，而呢啲炸彈就係孕育於未成年嘅社會縮影~學校入面。

電影嘅背景係一間學校，未有長期居留許可嘅海外學生同日本學生雲集喺入邊，兩位年輕主角一個係日裔一個係韓裔，亦都係一剛一柔嘅組合，性格迥異，但係佢哋喜好相近臭味相投，故事就由一次作弄校長嘅惡作劇開始，引伸出連環事件。

經過那年嘅風風火火，其實電影入邊講嘅嘢唔係太令人出奇，唯獨係臨尾最後一場禮堂爭吵就真係一個點睛位。學校、社會，確實係由唔同持份者組成，佢哋都各有唔同嘅立場，代表唔同嘅意見，有權力嘅人係應該有效地分配達致平衡，若果你冇咁嘅能力，而嘗試用高壓嘅方法去處理中間嘅凹凸不平，總有一日會有反撲嘅時候。

「若果我哋大學嘅時候先認識，我哋仲會唔會好朋友呢？」佢問緊呢個即將離別嘅好朋友。

觀念隨着時間改變，亦都隨着自己嘅經歷而調整，今日我哋可能好投契，聽日我哋可能面面相覷，不過無論點，我哋曾經一齊玩過喊過，珍惜當下。