iPhone 13 Pro 四個月使用心得

新一年，首先就祝大家虎虎生威，如虎添翼，最重要當然係身體健康。

不過我諗係講iPhone 13 Pro之前，絕對係有需要講吓我之前一部iPhone 6先。我記得當初喺2014年10月左右，我順利透過Apple iReserve購入iPhone 6，我就由果一日開始由iPhone 4升級到iPhone 6。當初啱啱接觸iPhone 6嘅時候，NFC呢個功能對我來講絕對係好好用，雖然未支援八達通，但嗰陣時唔使吓吓攞張實體卡出嚟就比到錢真係好方便。一路以嚟都仲可以使用，而且都冇乜面對太大問題。唯一一次拎去維修就係2019年暑假，因為咁岩行行吓山跌咗落地跌爆咗螢幕，之後順手換埋新電池，之後就一路使用到我換機之前。

本來喺2020年見到 iPhone 12推出嘅時候已經有打算要更換，因為已經開始不勝負荷，1GB RAM雖然仍可以順利開啟不同的app，但已經開始力不從心，不單止容易發熱，而且開始有啲lag，但都仲未去到未能使用嘅程度，所以諗住睇吓實際推出iPhone 12之後再作考慮。可惜受到疫情影響，有邊個諗到 iPhone 12系列嘅銷售周期竟然可以長達三個月，而且更甚嘅係只有 iPhone 12 Pro Max是擁有最良好的相機鏡頭（以當代iPhone來說），但我個人本身已經是持有 iPad mini 5，而且對於Pro Max這種超大螢幕尺寸的手機一直不太抱有好感，所以便希望可以順利支撐到下一代 iPhone出現才再作考慮。加上相信去到2021年蘋果的發佈會應該會回復正常，應該一樣也是在九月的第二個第三個星期舉行發佈會，如果我購買了 iPhone 12系列，應該會成為史上最短周期的 iPhone，心裏的感覺有點不太開心，所以便放棄考慮 iPhone 12系列。

去到2021年8月底左右，終於開始有消息流出iPhone 13的規格。雖然令人討厭嘅瀏海仍然存在，但係面積縮小20%，而且電量和相機等等均有不同品質的提升，所以便開始研究。本來我還是沒有打算購入，因為仍然是使用Lighting 連接，實際只有USB 2.0速度，相比起目前大部份手機也是採用USB 3.0 甚至乎採用USB-C一些更快的傳輸規格，加上相機模組比上一更加突出，搖搖板情況更加嚴重，所以本來研究完就決定再等落去。但遺憾嘅係，我用緊果部iPhone 6雖然仍然一切運作正常，可惜iOS只能去到iOS 12。本來都唔係啲咩太大問題，但我用緊嘅銀行app話會喺2022年開始唔再支援iOS 12，而且我亦都唔鍾意去銀行排隊，所以唯有真係開始認真考慮買iPhone 13。雖然你可能你問只係為咗一啲銀行嘅app走去換電話係咪好傻？係，無錯，我只係為咗區區幾個app而走去搵電話，但係你又要諗吓我之前係用緊邊一部電話喎。我係用緊一部用咗接近七年嘅iPhone 6，都係時候要換。

iPhone 13 Mini同Pro Max兩個型號基本上我都唔會諗，一個太細一個太大，所以淨係要諗13 定 Pro。如果用價錢來講，咁一定就梗係買13啦。本來我都係淨係諗住為13無諗住買Pro，等睇完發佈會之後上返Apple官網睇，發現雖然大家都係用A15晶片，但Pro比13有多一個GPU，雖然只差一個GPU，睇落相差好似好少，但如果要運算一啲比較複雜嘅程式或者遊戲嘅時候，多一個GPU絕對係相差好遠，同埋如果用將來來講，多一個GPU同埋多2 GB RAM，絕對會相差好遠，咁所以我最後都係決定寧願洗多少少錢買iPhone 13 Pro ，終好過第日買咗 iPhone 13先黎後悔。但之後雖然係決定買iPhone 13 Pro，但之後又面對一個問題，就係容量嘅問題。128GB同256GB我都一定用唔晒，但256GB或以上嘅容量版本可以拍攝4K ProRes 30FPS嘅影片，但128GB 版本只可以拍攝1080P 30FPS嘅影片，雖然我當初真係考慮買256GB版本，但之後諗深一層，就算可以拍到4K ProRes，但實際會用嘅機會可能真係無，既然係咁點解要嘥錢係一個過嚟可能由我買機到更換呢部機嗰日都用唔到嘅功能上面？咁所以決定不如慳返啲錢，買128GB就算。

每年搶iPhone嘅時候都總係比搶演唱會飛困難，但好好彩嘅係我竟然可以喺高速咁激烈嘅戰爭入邊搶到一部iPhone 13 Pro，而且送貨日期係10月中下旬，如果照計應該都唔係第一批製造出嚟，咁都可以預計喺11月之前就順利搵到新機。好彩嘅係結果10月中左右就送到我手上開始使用，相隔七年零三日，合共2560日之後，我終於由iPhone 6躍升七代，正式開始使用iPhone 13 Pro。

講到呢度，終於講完我整個購買經歷，終於可以開始講今日嘅主題：用咗四個月之後究竟有咩感覺。不過係繼續之前，如果你睇到呢度仲未咁上一頁離開嘅話，我發自內心多謝你，亦都希望你可以先拍五下手，繼續支持我創作唔同類型嘅文章，多謝。廢話唔多講，我哋繼續。

其實啱啱開箱嘅時候真係有啲後悔，因為螢幕大細真係相差太遠。我唔係話唔鍾意大螢幕，只係霎時之間難以接受。不過好彩用咗幾日之後呢個感覺就完全消失。我買嘅係石墨色版本，好聽啲就梗係話佢隻啞黑色好靚，唔好聽就係話唔想癡咁多手指紋上去，雖然之後我都唔知點解買咗個綠色嘅套，不過呢個又係另外一個故事。雖然開機之後我都好快做咗個套上去用，但係側邊嗰個不鏽鋼邊都仲係好痴手指紋。

講咗相機表演先啦。用iPhone 6上到去iPhone 13 Pro，我諗最唔習慣應該係嗰三個鏡頭嘅擺位，因為要花好多時間先至習慣影相要就果個角度。不過鏡頭嘅升級實在令到我驚喜萬分，因為佢嘅表現絕對係出色，而且影相之後嘅運算亦都好勁，簡單啲講即係只要咁一下個快門就可以提供到最靚嘅相片，雖然係好方便，但對於我呢啲拎開DSLR嘅人來講，影完之後出嚟嘅顏色其實真係有少少過分鮮艷，尤其是係係影食物嘅時候呢個問題更加嚴重，令到一啲本來唔係咁鮮艷嘅食物，經過處理之後顯得更加美味。呢個問題相比起唔習慣，我更加係唔係咁鍾意呢啲咁鮮艷嘅處理方式，不過無論係Apple好又或者係Samsung 、Google都好，呢個問題都係會出現，只係鮮艷程度嘅分別，可能對好多人來講係好事，但對我來講可能原色之後我再放入去PhotoShop慢慢執我會更加鍾意。

跟住就要繼續講相機，不過就唔係影相嗰個，而係Face ID。今次iPhone 13系列同iPhone 12系列最大嘅分別就當然係瀏海縮小，換句話講即係前鏡頭同face ID嘅模組更加細。雖然Apple無對外公開，但係大家都知道呢個就係傳說中嘅Face ID 2.0。雖然我就無用過前幾代嘅iPhone，但都仲係有去過Apple Store試玩同埋都有朋友用緊，相比之下13嘅解鎖速度真係快好多。雖然而家大家都仲係要戴住口罩過生活，要解鎖可能都仲係輸入密碼（當然亦都可以選擇除口罩，但記得係公眾地方就梗係要保持防疫措施），咁所以無得戴住口罩解鎖其實真係有啲不便。雖然可以用戴口罩嘅時候設定解鎖面容，但係咁樣會到場安全性大幅降低，咁所以我都係無咁樣設定。幸好係我打稿嘅時候，Apple 釋出iOS 15.4 beta版本，當中終於加入口罩解鎖功能，可以我相信好快就可以戴住口罩都可以順利解鎖。唔好問我點解唔買Apple Watch解決呢個問題，因為Apple Watch解鎖只可以係作螢幕解鎖，如果要使用Apple Pay或者登入一啲銀行嘅app嘅時候係完全唔可以用呢個方法解鎖，咁所以我由頭到尾都無諗過買Apple Watch。不過我又要咁講，雖然我無 Apple Watch，但我自己都係用緊Smart Watch，有機會再同大家講吓啦，不過我相信短期內都唔會有機會，除非我走去買咗Apple Watch可能又可以寫篇類似嘅文章Www 至於瀏海呢個問題，我個人因為未用過前幾代嘅iPhone，加上今次縮細之後個感覺無咁突兀，咁所以其實我個人就無特別反感，只係有少少唔明點解既然瀏海縮細咗，兩邊的位置有所增加，咁點解唔可以將電池顯示餘下幾多％電量顯示出來，一定要往下拉才可以顯示？唯獨係呢一點我係極度不滿。

之後就講吓螢幕，呢樣對我來講應該係最有感覺嘅升級。由iPhone 6嘅4.7吋螢幕升級到去iPhone 13嘅6.1吋螢幕，雖然可以睇嘅範圍係多咗，但係因為螢幕相對大咗，我單手拎電話嘅時候有啲驚捉唔實跌落地。雖然用咗差唔多四個月，但呢個大細我都仲係有少少未接受到，始終都仲係驚驚地。至於OLED螢幕，我真係完全唔識得感受，淨係知道啲色彩好靚Www 另外好多人關心120Hz螢幕 （ 稱為ProMotion技術）係唔係真係咁好用同埋係唔係真係有感覺。我只可以講，其實完全真係分唔到，啱啱開機嘅時候咁當然係俾佢嘅順暢度嚇親，因為相比起我舊果部iPhone 6，嗰種流暢程度真係唔識用文字形容，但係呢個除咗係因為螢幕之外更加係因為佢嘅硬件有所升級而帶嚟嘅，所以即使過咗四個月之後，你問我係唔係真係咁好用或者有需要？我會答你需要係有嘅，因為其他牌子大部份都已經做到呢個技術，Apple絕對係輸蝕；但係相比起其他牌子，佢亦都可以透過呢一個技術控制螢幕由10Hz到120Hz之間切換，從而達致更加慳電嘅效果，相比起其他牌子，彷彿又高人一籌，所以只可以話係有需要，但係可能因為我隻眼視力只有2.0，咁所以其實我真係分唔到幾時係120Hz，幾時係60Hz，幾時係10Hz。雖然有人研究過就算係一般嘅畫面（例如主頁同你對120Hz進行優化嘅app）最多都只有80Hz，不過反正我都分唔到，無所謂啦，哈哈。

既然上面都講到電池，咁不如就講吓續航力。雖然我之前嗰部iPhone 6經過換電之後，健康度回到100%，但始終因為電池太細，用到下午4、5點左右就要叉電，好難先至可以捱到夜晚返屋企。但係自從換咗iPhone 13 Pro之後，電池容量大幅度提升，加上係屋企嘅時間比以前長咗，長時間都係駁屋企Wi-Fi，咁所以其實係耐用咗好多，最長試過兩日先叉一次電，依家平均一日半左右先叉一次電。就算真係要一早出街，夜晚食埋飯先返屋企，都仲可以有30%左右電量。正如我上面咁講，OLED螢幕加上ProMotion技術，即使幾年後電池開始老化，我相信仍然可以支撐到我日常生活所需，最多可能只需要一個容量比較細嘅尿袋帶出街已經足夠一整天嘅使用。

之後就講吓硬件，正如我上面咁講，A15晶片配5個GPU，整體運算速度絕對係喜出望外。雖然我唔係一個極度沉迷手機遊戲嘅人，但係我都會間中會用手機玩遊戲，加上我主要是玩音樂類型嘅遊戲，精準度是最重要的一環，所以用咗咁耐其實一路都無遇到好大嘅停頓問題，甚至乎無出現過彈app嘅情況。咁當然除咗玩遊戲之外，我間中亦都會用iMovie 進行一啲簡單嘅剪接，只可以講佢嘅影片輸出速度，應該只係輸蝕比M1系列，但已經絕對足夠我嘅日常使用。只係當我長時間遊玩或者使用iMovie 嘅時候，機背便會開始發暖，但並不是去到發熱的程度。如果有機會，我應該會真係試吓出去拍片，測試一下呢部機嘅極限，不過只可惜而家疫情嘅關係我都係留係屋企比較好，大部份嘅功能都無未有機會嘗試。另外就係我終於可以用到一個渴望咗好耐嘅功能，就係可以手機八達通，因為我終於唔使吓吓袋住張八達通係褲袋，一來怕跌咗唔知，二來就係用電話增值真係方便好多，唔使次次都要搵便利店咁麻煩。

大約講完各方面我對呢部電話嘅評價，最好就梗係要講吓整體嘅感覺。總結來講，你問我有無後悔？我可以答你無，甚至乎可以同你講我係好慶幸等多接近一年，選擇購入iPhone 13 Pro而不是iPhone 12 Pro Max。不過到而家為止，我始終都係未習慣嗰個重量，同埋雖然厚度比iPhone 6厚咗好多，但始終我都係唔敢放落褲袋，一來怕好易跌出嚟，二來就係覺得好容易會拗攣，咁所以都係決定繼續攬返個腰包，擺喺腰包入邊比較好。

至於值唔值得購買呢個問題，如果你係iPhone 8或者之前嘅型號，我絕對建議你係可以值得考慮，始終技術相差太遠，更換後絕對能夠有一種喜出望外嘅感覺，加上逐漸不再提供iOS更新，終有一日會面對安全性問題和程式開始不再兼容；但如果係iPhone X或之後嘅機種，我就覺得可以等埋今年九月iPhone 14嘅發佈會再決定，因為好大機會會改用USB-C同埋瀏海消失，加上亦都有傳有機會重新提供指紋解鎖，絕對係比iPhone 13有更好嘅體驗。

衷心多謝你又睇完一篇廢文，走之前希望大家可以慷慨解囊係下面拍五吓手，作為繼續支持我創作嘅原動力，お願いします。