強制頭盔「好心做壞事」

2021-2022疫情期間，單車意外數字有上升，政府有意於2023年內提出立法強制所有踩單車人士必須戴頭盔，違者可被罰款2,000元。

呢個做法就好似多咗小朋友喺公園兒童遊樂場跌傷，就要強制所有小朋友入遊樂場要全副保護裝備？

又或者，每年交通意外20000人傷，死100人，咁不如強制全民行街、坐車、揸車要頭盔？

「得不償失」

如果真係立法結果會點？結果係踩單車人數立即減少，單車發展停濟不前，違反政府鼓勵市民多做運動嘅方針。

有啲國家例如澳洲超過30年前立法強制頭盔之後，整體踩單車下降20至40%，30年來世界單車使用率大大增長，澳洲卻停滯不前，後果就係得不償失，因為市民少咗做運動而帶嚟更多都市病嘅死亡，整體去計算，比起戴頭盔能夠拯救嘅少數生命，強制戴頭盔其實「好心做壞事」。

以最樂觀85%戴頭盔保護率計算，只要單車使用下降2% (澳洲經驗係下降20至40%！)，害死嘅人已經會多過救到嘅人，結果「得不償失」。

「好學唔學」

如果要提升香港單車安全，應該學下其他單車友善地區點樣照顧踩單車安全係咪？

咁大家認為邊啲地方係踩單車好安全好友善呢？會唔會係荷蘭？你估人哋係咪全民戴頭盔踩單車？事實荷蘭只有0.5%嘅人係會帶頭盔踩單車！

好明顯，世界各國單車安全唔係因為戴咗頭盔，係因為有完善嘅單車友善政策、良好嘅規劃同埋教育，呢個先至係王道。

有啲國家（例如以色列）本來有強制頭盔法例，後來都陸續取消，點解香港仲要逆線而行上反單車友善嘅舊路？