通俗解構各種黃金投資方式及隱藏風險

作為一名尋釁滋事嘅慣犯，三哥我一直係靠小本投資維生，除左玩外匯，我比較敢大膽落手嘅以港股為主，個市發癲就走返去trade貴金屬，自從武漢肺炎陷球剷起、美股熔斷、原油期貨變負資產，愈來愈多朋友問我買金點樣好，而我留意到黃金相關產品係咁出嚟，連我兌開crypto個間Tidebit都出黃金Crypto，我諗係時候寫第一篇處女作，以懶人包方式俾大家搞清楚投資黃金嘅各種方式同隱藏成本，但都係嗰句，唔好問我策略，never，一陣賺左唔多謝我、蝕左又搵我。

實金

特點：儲藏成本高。

老一輩人好興租個夾萬放金條，至於去金舖俾人賺手工費咁笨實就無謂講，就算唔計手工價都起碼蝕半成，個價又唔貼，所以好多精明嘅老派「金主」都係去銀行買賣金，而香港做retail banking嘅銀行基本有實金買賣服務，每轉你預要最少蝕0.3%。

個人嚟講唔會用呢個方法，「土地問題」亦適用於銀行夾萬，又難租又麻煩，平心而論，無咩特別原因hold實金，其實唔係明智嘅選擇。

黃金存摺（即係紙黃金）

特點：方便管理，但係有得睇無得拎。

好多散戶都係貪佢入場門檻低，千幾蚊港幣有得玩。事實上，紙黃金可視當為你同發放機構嘅投資合同，純粹你係預黃金升而有利潤，大家亦唔好曲解為「委托儲藏」，例如你去某間銀行開本黃金存摺記入左十兩黃金，如果你個仔結婚想換返出嚟呢，係唔得嘅，貼錢都換唔到，只可提現。而提現個時，理所當然要承受發放機構提出嘅差價，而所謂黃金存摺，定期放無利息，政府個存款保障亦唔會保你，要硬食差價又咁唔流通，點解要買？好多時候想買金抗通漲嘅叔叔嬸嬸船頭驚鬼，船尾驚賊，咁咪益下人，一個願打一個願捱。不過連5號仔都發芽嘅時候，大家要睇清楚賣紙黃金俾你嗰間金融機構，會唔會受到嚟緊嘅全球經濟衰退影響，一旦執笠清盤，就變成「牆紙黃金」。

黃金ETF

特點：貼價又流通，老司機最鐘意，但要非常小心

一提ETF，好多人會諗起倫敦金騙案，當時係因為班黃金經紀氹街客授權佢哋代為操作ETF，班經紀為咗交易手續費亂咁trade到客人account。香港現有嘅黃金交易所買賣基金 (ETF) 都係港交所買嘅，目前有3隻：價值黃金ETF (03081)、SPDR金ETF (02840)同恒生人幣金ETF (83168) 。

買ETF同買實金有類似，發行機構係持有相應嘅實體黃金，trade開金ETF嘅通常都係睇SPDR金ETF 或者 價值黃金ETF，個價格係跟倫敦金銀市場協會 (LBMA) 嘅黃金牌價。呢兩隻ETF都可以兌實金，不過事先要同發行機構傾好，SPDR金ETF換實金門檻係10萬股、價值黃金ETF換實金門檻係30萬股，都係兌換返1萬安士黃金，要九位數字港幣……

買賣SPDR金ETF及價值黃金ETF的入場檻分別係10股，同每手100股，分別大約要萬二同4千港幣，而呢兩隻ETF每年要～0.4%基金管理費，交易費等雜項開支另計，因為無對沖成份，所以同買實金一樣，個市一插水ETF價格係會跟住落。

黃金Crypto

特點：貼價而且無收市時間，要小心安全同揀清楚發行嘅交易所

玩開FX嘅我都掂咗crypto好多年，無發達原因係大學挖嘅BTC百幾蚊放曬～

黃金相關嘅加密貨幣其實無一個統一嘅絕對標準，但共通點都係同ETF一樣sell佢貼價而可以傳統金市收市時trade(7x24)，而且係持有返相應嘅實體黃金現貨，但係crypto呢樣野好考驗發行機構嘅信用，如果某個交易所喺你所地方無retail前台服務，其實同喺太空無分別，某啲「強力人士」開嘅交易所係好鍾意熄機扮hang機，賠返本金你算Q數（咁樣已經打曬飛機話「好有信用」），你見唔到佢哋只會無門申訴；另外，都要同trade其他crypto一樣，留意返套現要嘅手續費，同埋每筆交易嘅交易手續費 / gas fee。以三哥所知，trade黃金crypto嘅一係就係專業trader，一係就B2B庄對庄，精明嘅玩法三哥就唔公開講啦！都係嗰句：廢事一陣賺左唔多謝我、蝕左又搵我。

沙特油王已經好霸氣咁用石油「淹沒」嚟緊5月嘅世界市場，G7政府相信亦會繼續印銀紙墊低，試圖應付武肺黑天鵝帶來嘅延後經濟災難，大（熊）時代將會不斷以新形式出現，被喚醒嘅灰犀牛寫一頁紙都數唔曬，希望有緣睇到呢篇文嘅各位自求多福！有機會有時間再分享一下灰犀牛對各方面行情嘅影響！