午夜夢迴時 一切如詩如畫
在外國留學讀書的時候，見證過不同文化生活的喜與樂和人性中最善良的一面
尚記得出國前，我對外國的環境一無所知。
因為小時候一直住在新界區，長時間留在家中打機睇漫畫，唔好話出國經驗冇乜，甚至連自己出港島區嘅經驗都10隻手指數唔數得晒
我當時出國嘅心情真係非常之戰戰兢兢，自己成績唔好，英語能力近乎等於零
幸好出國後的一些難忘經歷，令我好快下定決心要適應外國生活，亦都要融入外國人嘅文化
其實外國人的生活大部份都非常純樸
當時我住喺外國農村小鎮中的一個非常虔誠天主教家庭入面。
當時internet 未普及，一切都係好純樸，日常生活無乜娛樂，只係聽吓CD, 踩吓單車同滑板
家中的電視機只會限時播放天主教主題的兒童卡通節目錄影帶。因為呢個家庭將屋企的天線剪掉，避免小朋友接觸到物質化的不良資訊
日常的生活，基本上都是在後花園種植粟米，生菜，蘋果，梨，番茄和薯仔。
更有趣的是，他們飼養的動物是全方位在花園和家中走來走去的， 包括兩隻貓，四隻雞，三隻鴨，兩隻龍貓鼠，同埋無數的熱帶魚
唔好以為呢個家庭居住環境非常好。其實居住衛生環境都頗為惡劣。
該家庭崇尚自然生活方式，已盡量不干預嘅態度去處理動物的活動空間。你或者唔可能想像到，全屋係地氈地，但係雞同鴨會全屋走，仲會周圍屙屎屙尿。
朝頭早比雞嘈醒已經係基本，有時瞓覺比敲門聲嘈醒，打開門見唔到有人，仲以為撞鬼。原來係隻鴨喺門口啄道門
另外廚房基本上長期有二，三十隻烏蠅，因為呢個家庭經常會將廚餘堆肥。
成個空間都瀰漫着發酵嘅味道
而且城市周邊都有好多粟米和和蘑菇田，一到收割季節之後基本上成個城市都臭不可擋
至於外國人的家庭經濟，同華人嘅經濟理念真係好唔同
呢個家庭的爸爸是在NGO機構工作，收入一d都唔高。
記得第一個星期去到呢個家庭屋企居住，佢哋見我帶銀包返學，問我帶咗幾多錢現金？
我答完佢之後，外國媽媽好驚訝咁講: “That is way too much money you are carrying with you! We don’t even have that amount of cash in the whole house. It’s too dangerous”
其實，當時我只有$20加幣喺銀包，即係大約一舊水港紙。
當時同呢個家庭嘅生活由陌生去到熟絡，由熟絡則變成親人般的關係。我幫佢哋照顧小朋友，由換尿片去到沖涼，去到教佢哋讀書上堂每件事都當正係親人咁投入去做。如是者同佢哋一齊生活咗一年半
直到有一日，喺學校放學嘅時候，校務處開咪叫我個名去校監。
我喺當時學校其實同所有校長老師關係都非常之好，所以聽到開咪叫我個名，我都冇乜奇怪嘅感覺。
點知見到外國家庭媽媽眼濕濕咁正在和校監等我。我完全有點不知所措。
外國媽媽當時一邊喊一邊喺度講：「我哋當初參與寄宿家庭計劃，原意只係希望為家庭帶來額外的收入，但係和你相處日子越耐，發覺成個家庭寄宿計劃唔單止係講收入和回報咁簡單。而係經過生活和相處之後，你已經成為我哋家庭嘅一份子，而且你係全心全意用無條件嘅”愛”去對待我家庭中的每一位成員。但係對於我和先生諗返當初的理念，我哋越來越對你有愧悔之心，我哋覺得你嘅付出應該有一個更好嘅生活環境，我哋知道校監一直都非常喜歡你，曾經多次問你有冇興趣搬過去同佢地一齊住，但每次都被你拒絕，今日嚟到，我係希望主動提出終止呢個家庭住宿計劃，我哋希望你可以搬去和校監生活，有一個更加美好更加完善嘅生活環境中學習和成長」
當時我簡直係晴天霹靂。
其實居住環境惡劣，我是一直知道，但從來毫不介意。
香港的媽媽久不久便會問我生活環境如何？因為他知道該家庭環境着實不太理想，但我每次都真心回覆佢覺得冇問題，我好享受這種原始的生活方式。
校監和我的關係其實一直都非常之好，每日小息和放學後我都會到她房間談天說地聊天，所以佢對我一直好像親生兒子一般。而且問過我好幾次要不要考慮搬到她家中一起居住，但每次都被我禮貌地婉拒
到最後外國媽媽抱着我，叫我今次唔好再拒絕校監的邀請，過去展開新生活。
講到呢一個地步，我只好流着淚答應
當時有幸生活喺好似宮崎駿電影的”龍貓”小鎮，著實係幾生修來的福氣
在香港，每日見證着難以理解和接受的事情發生，對情緒管理着實很大衝擊。還好人會發夢，可以在夢境中找回一些現今香港失去的人情味和善良的種子
希望喺黑白嘅世界，我可以將當日種植在心靈深處的善良種子一點一滴繼續傳承，令每一個相遇嘅人可以見到善良之光，繼續讓善良的種子發芽成長
本文轉載自 ‘智慧社區 Wise Community’ Facebook 2020年5月16日貼文
