頭盔: 升學及就業規劃依家嘢就好睇個人嘅，其他人得未必你都得，每個人都有權去選擇各自嘅路，並唔係硬性規定你一定要點點點。
忠告: 條路自己揀，仆街唔好喊。

話咁快七月，即係代表一年一度嘅放榜時刻。依篇文唔係教你5**就點點點，攞2X分嘅就點點點，跛腳就點點點，亦都唔會hardsell邊間Asso/HD好呀，升學率高呀，雖然我係掛住個「Asso仔」個名，都叫做係過來人，但係鬼咁得閒幫學店賣廣告咩，依啲嘢自己睇本「升學指南」或者上連登問就得架啦。啱啱相反，我反而係想教你哋用點樣嘅心態嚟面對放榜依個「人生交叉點」嘅時刻。

萬事興趣為先

首先嘅喺問自己一樣嘢: 自己真正鍾意嘅喺啲乜嘢，又或者有乜嘢你係感到興趣。依一樣嘢不論係JUPAS改選又或者簡讀Asso/HD，都係好重要唔好你話依啲嘢睇落好似好廢，其實老實講簡科就好睇你嘅興趣，如果你係讀緊一啲自己根本無興趣嘅科，成績當然未必係會好差(事關exam嗰啲都仲可以操返嚟)，不過你讀書就一定讀得唔會開心。之但係如果你真係依家依一刻暫時仲未搵到自己嘅理想興趣抱負嘅話，不妨去簡下一啲「大類收生」或者year2/3先至揀stream嘅科，起碼有成年時間去接觸唔同嘅專科，到時先至睇番邊一項範疇你係勁嘅都未遲。雖然父母嘅意見、讀完出嚟做嘢嘅人工嘅其他因素都係你去做抉擇要諗嘅嘢，不過讀書嗰個就係你，唔係你老豆老母，咁所以到最後都係以興趣行先。

如果你睇到依一到，我都好希望你係有報E-APP。講真，你唔去到8月都唔會知你最後JUPAS有咩offer(又或者最後no offer)，咁所以如果你有報E-APP(又或者自己去院校網站報名)嘅話係放榜日就可以施施然食個早餐先去claim offer都未遲(suppose你meet到嗰conditional offer)，唔駛鬥快同人撲剩低嘅學位。E-APP唔一定比你去報Asso/HD，唔同院校都仲有啲自資學士學位嘅課程(政府仲好似有資助)，當係買個保險俾自己。不過如果你無報到，咁你就要依家睇定本《升學指南》，一早plan定放榜日嘅路線(當然仲要好清楚自己揀咩科)，咁成功率自然就大大提高。到最後JUPAS放榜結果出到嚟係你自己鍾意嘅，咁咪先再去交$5000留位費囉(部分院校都可以因為你最後揀咗JUPAS嘅offer而可以退翻先前交咗嘅留位費)。

一接到DSE張成績表之後，最重要嘅就係要保持冷靜嘅情緒，唔好因為見到有個1或者2就猛咁喊(攞到5**當然要笑出聲啦)，因為成績係咁就係咁，好難話會去忽然升高一兩個grade，所以個grade有幾爛都要學識去接受(依一招去到第時出GPA都係咁用)。但係如果你發現最終成績同你預期爭得太遠，可以嘗試下appeal嘅，當係買多次希望，雖然成功率係非常之低，但係博埋最後一次嘅機會(博到嘅話HKEAA會回返水俾你)，心理上會心安理得(利申: 小弟都有appeal過，最後都成功上翻一個grade，一定係成日幫阿婆執紙皮汽水罐扶阿婆過馬路)。

如果你嘅成績真係太低(攞u/1)嘅話，我諗你真係要睇下自己係咪真係好鍾意讀書。事實上，攞住咁樣嘅成績而去讀毅進(咪L簡紀律部隊之後去做狗)再慢慢HD/Asso再駁返上大學學位大有人在，之不過讀書辛苦嘅程度可以話係比平常人大幾十倍，所以都要做好心理準備之後果幾年都係要猛咁讀書，先至好決定。

Retake vs 海外升學

諗返起我放榜果陣時，身邊都有好多同學朋友中文都2咗，不過佢哋就選擇去外國讀大學，因為有啲大學唔一定要有33222先至話收嘅(跛咗中文都仲有得救，不過其他科都要有返咁上下，同埋有埋IELTS就穩陣好多)。除咗收生要求可能會低一啲之外，加上香港而家咁嘅時世，有得走當然走就好啦，不過建議就唔好揀埋啲野雞山卡啦大學，最好去QS睇一睇個ranking。而至於retake方面，除非你係想retake非語文嘅科，事關語文科升grade嘅機會率一直都唔高(雖然一年淨係讀一科語文之後先到3/4大有人在，不過更多嘅人唔升反跌，依個世界無一樣嘢係包生仔嘅)，

講真，每個人嘅成績、興趣同理想各有不同，真係好難好specific講晒咁多個case要點樣，畢竟你哋都(就嚟) 十八歲攞成人身份證㗎啦，條路就你自己一個人行，世界上冇一個人係可以阻止到你點樣行。最後，都希望咁多位睇到依篇文嘅莘莘學子能夠旗開得勝，唔駛讀Asso就可以輕鬆升大學。如果覺得依一篇文有用，不妨share俾身邊朋友同學，就算人哋考得不如人意到可以開解下佢。如果你有嘢想分享下但係冇對象發洩，不妨去pm我facebook/ig，睇下我幫唔幫到你(順便賣個廣告)？