AV

咸濕仔煉成誌

「我任你點為食，會唔會俾三四十蚊入場睇一套《蒸氣騰騰小龍飽》呀？或者《雜果沙律齊齊上》！我任你點為食呀，你會唔會為咗一舊冇包住嘅牛𦟌望到俾車撞呀？」 — 黃子華《色情家庭》（1991）。

的確，「食、色，性也。」對於香港人嚟講尤甚；因為作為一個香港人，飢荒、或者窮到冇飯開，實在離你很遠（唔係話冇，不過少之又少）。正所謂「飽暖思淫慾」（雖然喺香港返工，更大機會你會思床褥），餵飽咗個肚之後，想餵飽埋下面實屬正常。

事實上，我哋細細個開始，就好咸濕；只不過係扮晒嘢唔敢認。（根據多年嘅觀察，唔認嘅人，一般都更咸濕。）

呢篇文，係講我由細細個偷睇老豆嘅私人珍藏開始，一直到大人大姐有女有竇有自由一邊睇一邊砌嘅睇AV經歷。呢篇並非AV鑒賞指南，所以唔會有番號提供；各位且慢除褲。

男讀者就算唔係我呢個年紀，對呢篇文都應該會有啲共鳴（儘管你哋唔敢認）。至於女讀者，你哋忍咗我啲粗口咁耐都冇打冷震，其實已經好叻豬㗎喇！呢篇，你哋就當入咗動物園、睇緊啲動物生態奇觀啦。或者睇完後，你哋會對你哋嘅男友及/或老公，有更進一步嘅了解都未定。

我知道寫完呢篇嘢之後，我喺你哋（特別係女讀者）心目中固有嘅優雅形象會蕩然無存。不過唔緊要，形象對於我嚟講，就好似浮雲一樣。更何況，本來無一物、何處惹塵埃呢。

喺我童年嘅年代，係冇AV嘅。

我當然唔係話嗰陣呢個地球上，冇Adult Video呢樣嘢。我想講嘅係，當時，呢樣嘢唔係叫「AV」；係叫「小電影」、「咸片」、「咸戲」、「咸帶」。

作為一粒七八十年代喺香港長大嘅𡃁仔，同好多其他𡃁仔一樣，我認識「鹹片」呢樣嘢，係由電影海報開始。當年，銅鑼灣有間幾大同幾出名嘅西片戲院，叫「豪華」（唔係旺角嗰間，銅記豪華嘅位置，就係而家嘅「怡和街68號」，前稱「百利保廣場」）。

豪華戲院

（其實對面海嘅「普慶」、「大華」、「快樂」之類嘅戲院，都係類似嘅戲院；不過，我選擇講我比較見得多嘅「豪華」。）

銅記豪華戲院，並唔係清一色嘅咸片戲院。喺大時大節大檔期，豪華其實係間播放首輪電影嘅西片戲院。但係當淡季嗰陣，佢就會變成一間播外國「咸片」、如經典軟色情電影（Softcore）《艾曼妞》（Emmanuelle）系列、或者好似《發條橙》（A Clockwork Orange）之類唔係咸片、但都俾人當咸片（當年嘅香港民智係咁上下）嘅戲院。

留意返，喺七十及八十年代早期嘅香港，真正嘅硬色情電影（Hardcore，即係打真軍）喺香港，係比較少有嘅（就算有都剪晒）；無他，市民仲未接受到呢種風氣嘛。

豪華戲院之所以喺港島區嘅咸濕仔心目中地位咁特別，全因為佢獨特嘅地理位置 — 試想像，喺銅鑼灣嘅中心地帶，你一抬起頭，就見到一條胸前有兩粒黑星嘅裸女喺度騷首弄姿。對於一條仲未識扯旗住嘅𡃁仔嚟講，係幾咁震撼嘅一件事。

當年資訊唔發達、報攤阿叔嘅道德操守仍然比較高、唔會隨便賣《龍虎豹》、《男子漢》同《老爺車》俾𡃁仔；可以接觸一手色情資訊嘅機會，實在唔多。豪華戲院門口嘅電影海報，可以話係幾許七十後當年嘅啟蒙性教育。

雖然，我都仍然要一段日子之後先至知道，原來女人嘅nipples唔係黑色星形嘅。（你估而家有幾多𡃁仔認為女人乳頭係四方格仔形？）

咸帶

第一次接觸到真正嘅「咸帶」，應該係大約十歲嗰年。某個晚上同父母去咗某uncle屋企食飯；飯後，幾個大人講一啲關於「小電影」嘅嘢；阿媽聽到呢個話題之後，就趕咗我入房同uncle個女玩（九歲，完全冇fastasy嗰隻）。作為一個求知欲好強嘅細路（其實係兩個），我哋當然唔會善罷甘休；於是，我哋決定偷聽……

聽到啲乜，其實都唔係好記得（我嘅超人記憶，似乎係喺美國練成）；我知道嘅係，當晚返屋企，父母手中多咗餅錄影帶，兼且佢哋收得好密，鎖起喺櫃桶。佢哋咁多年都係咁，以為一把鎖就可以難到個細路；佢哋實在好傻好天真。

第二日放學，我趁阿媽帶咗阿妹去學琴、工人出咗去買餸嗰陣，開咗佢哋房個櫃桶（其實二年級就學識，否則點偷老豆個私章去扱學校寫手冊投訴我太百厭嘅回條）；然後，我終於睇咗人生第一段咸片（真係睇得一段，因為驚有人返屋企）。

嗰部係一部法國片，因為我連一句對白都聽唔明。電影嘅背景應該係七十年代，因為男女主角仲係著緊喇叭褲。

第一次睇咸片有咩感覺？

首先，原來十歲嘅𡃁仔已經識扯旗。又由於十歲嘅細路，冇相關嘅知識，所以有好一段時間，我仲以為自己患上絕症 — 我聽我嘅醫生老豆講得多，生cancer最普遍嘅症狀，就係唔知邊度「硬咗」、「有硬磈」。家陣我無啦啦成條嘢硬咗，仲唔係生cancer？！

十歲就生JJ癌，我真係命苦……（touchwood, touchwood）

因為我當時仲未領略到，男女主角嘅「活塞運動」究竟係幾有快感嘅一回事；我亦唔明白，女主角點解俾人咁樣插到嗌晒救命都唔報警。睇完後，我第一個感覺，就係……唔kiss得唔得呀？

我係一個有少少潔癖嘅人，好怕人哋嘅口水。我連阿媽嘅口水尾都唔肯食，你家陣叫我同個女人係咁喪啜交換口水？！咦……

但係我又好想，好似個男主角咁，又揸又錫人哋個胸喎（喺嗰個年紀，胸先係重點）！咁點先？可唔可以skip咗kiss呢部份、然後淨係做其他嘢呀？

呢個問題，一直困擾我，直到我第一次同女人有同類嘅「接觸」為止。

姑勿論種種嘅困擾，第一次睇咸帶嘅回憶，仍然係甜蜜嘅；雖然「咸」同「甜」之間，冇必然嘅關係。亦都因為咁，自後我都成日心思思，想再睇多次。除此之外，我亦確定咗我嘅志向：大個仔之後，我一定要揸女仔個波！

外國真係開放啲（？）

喺美國讀書嘅年代，我一直都抱住「外國開放啲，可能好容易就有得睇咸片」嘅心態過活。遺憾嘅係，整個junior high嘅過程，我都冇機會睇多次咸片，最多都係睇咗幾本Playboy同Penthouse（仲有Hustler同Juggs）；聊勝於無。

每一個幸福嘅死𡃁仔背後，都有一個屋企有兩部錄影機、可以dub咸帶嘅同學（通常都係肥仔）。我嘅幸福，出現喺我高中嘅第一年。

肥仔同學唔單只屋企有兩部錄影機，佢仲有一個唔錯嘅咸帶collection，聽聞係佢老豆嘅珍藏。喺無數罐Dr. Pepper同無數包Cheetos嘅「賄賂」下，佢終於應承咗，幫我dub一餅咸帶「睇門口」。

成就解鎖！我終於擁有人生嘅第一餅咸帶！呢餅帶足足跟咗我接近十年。

除咗咸帶，我人生嘅另外一個重要人物，亦都係喺呢段時間登場 — Erika。

有睇拙作《漢城》嘅文友，都應該知道Erika係邊個：佢係我當年嘅「霧水情人」。Erika係白人+拉美混血兒，大我差唔多兩年。喺十五六歲嘅年紀，「姐姐」永遠係最吸引嘅女性 — 乜都唔好講，起碼大我同班同學兩個cup先！

我同Erika唔係情侶關係，但係因為呢餅咸帶，我哋開始咗我哋嘅「third base relationship」。

即係點？即係除咗最後嘅「防線」之外，我哋乜都做齊。咸帶俾咗我第一手嘅性知識，Erika俾咗我鑽研同切磋「武功」嘅機會；加埋就係《九陰真經》嘅上下卷。呢兩件人事物，對我日後嘅感情路，起咗決定性嘅作用。

（時：10th Grade；地：我間房；人；我同Erika；事：睇緊愛情動作片。）

E：（好不經意咁望一望我）你扯緊旗喎！（You have a boner!）

A：（扮不經意）睇緊戲吖嘛。

（五分鐘後）

E：你仲扯緊旗喎！

A：咁套戲未完場吖嘛。

E：（有少少猶豫）你……可唔可以俾我睇吓呀？

A：（仍然懵撚盛盛）你咪睇緊戲囉！

E：唔係呀，我講緊你支旗呀……

A：（有啲驚）我……我點俾你睇呀……

E：（都有啲驚）最多……我俾返你睇吖！

A：睇乜先……

E：（將件Tee嘅領口拉低、露出深深嘅事業線）你最恨睇嘅胸呀……

A：（即時連老豆姓乜都唔記得）嗱！講好咗㗎喇！係㗎喇！

E：（除低T恤，露出誘人嘅黑bra）係喇，咸濕仔（perv；人生第一次俾人叫咸濕仔，從此萬劫不復）。

（之後，房間內冇人再有興趣睇咸帶，但係呻吟聲越嚟越大。）

當然，Erika亦都幫我克服咗「怕kiss」呢個死結 — 當你連口交都試過，打個車輪啜幾嘢，其實真係唔算得啲乜。「打大佬」永遠係升呢嘅最佳方法。

今明、明月、油麻地

同好多出國留學嘅人一樣，我都仍然同喺香港嘅舊同學保持聯絡。幾個正處於青春期嘅麻甩仔，一定會傾到睇咸片呢個話題。於是，某個暑假，我哋就決定，一齊去戲院睇咸片。

當年（十五六歲）雖然已經開始咗電影三級制，但係戲院唔係捉得好嚴，查身份證嘅機率唔高；當然，我哋幾個又真係生得夠高大，帶位喺門口望一望我哋個高度，問都冇問就放咗我哋入去。

同香港朋友睇咸片，最「驟忌」嘅，就係扯旗 — 其實我唔明呢啲係咩心態，去得睇咸片，扯旗就梗㗎啦！唔扯你先驚呀！但係日後朋友之間，又會將呢啲嘢當是非咁傳嚟傳去，兼且用嚟恥笑對方喎！所以話，𡃁仔好多時真係唔知自己做緊啲乜。

不過，話分兩頭，去香港嘅咸片戲院睇戲，能夠忍得住唔扯旗的話，你最好都係唔好扯旗；就算扯，都搵啲嘢遮吓。

某一次，當我哋又聯群結隊去睇咸片嗰陣，坐最側邊嘅朋友，就因為扯旗，俾隔籬個阿伯摸……我哋知道後，當然拉大隊走人（唔夠秤睇咸片，所以唔敢搞事）；之後諗返，真係好噁心。

亦都係為咗睇咸片，我哋經常出入西灣河太安樓（金明）、土瓜灣（明月）同埋窩打老道果欄（油麻地；呢間係最噁心嘅）呢啲你一般行街shopping唔會去嘅地方。

誓要去、入刀山

喺咸帶呢個領域入面，香港係個嚴重封閉嘅地方。想擁有一餅咸帶，你一係自己由外國帶返嚟（海關查到會沒收）、一係搵人幫你dub；如果兩樣都冇的話，你就只有去買啲俾電檢處剪到支離破碎嘅「三級影帶」。

其實，仲有一個方法，可以俾你買到「冇格仔、有嘢睇」嘅咸帶；不過，就唔係你去帶鋪、睇啱拎去俾錢咁簡單。

喺環頭環尾嘅一啲「地踎」商場入面（北角未裝修好嘅國都、世運，MK「四樓有四仔」嘅好景，砵蘭街嘅好旺角等等，都係呢類場之一），會有啲鋪面貼滿晒海報、睇唔到入面嘅鋪頭，鋪頭門口放住塊螢光紙牌，寫住「一套200、兩套300」或者「SM、人獸、孕婦、黑人」之類作招徠。某日，我就因為捱義氣陪朋友（佢好恨買餅咸帶），入咗呢啲「龍潭虎穴」。

鋪裏面乜都冇，就係得張鋼寫字檯同幾張摺櫈（方便開拖啩）。我哋顫顫驚驚咁坐低，入面睇鋪嗰個金毛哥哥就以收陀地嘅語氣、問我哋「想揀啲咩呀」，然後就將一本寫滿戲名嘅硬皮folder打開、放喺我哋面前。

我朋友求其點咗兩個名（佢仲驚過我）；金毛哥睇完後，就話：「呢啲係特別片種喎！要二百五十蚊一餅；有冇問題？！」

呢個時候，就算你有問題，你敢唔敢出聲？我哋當然唔敢。然後，金毛哥打咗個電話，噏咗兩個冧巴。講完電話，佢哋就叫我哋「等等」。

大約五分鐘後，有另外兩條金毛入嚟。佢哋分別喺褲後腰每人掹咗一餅帶出嚟；我心諗，「走粉」就話聽得多啫，「走帶」我今日真係第一次見。

拎咗帶，我個friend連對號碼都唔敢，就嗱嗱聲擺低五舊水，然後掹住我走人。

還好，後來佢話返俾我聽，貨色對辦。佢揀咗兩套大波鬼妹嘅片，嗰兩餅真係大波鬼妹，不過波大年紀都大。

幾蚊一餅錄影帶，dub條老翻咸片落去就可以賣二百五，有呢啲咁筍又相對安全嘅生意去做（海關掃場咪最多罰錢），邊個會去收陀地放數走粉迫良為娼劈友？咸帶事業係社會穩定嘅根基。

女仔唔睇咸片？

我哋呢代七八十後嘅電視教育，呢個地球只有男人咸濕，女人係好正經兼唔睇咸片嘅。電視劇嘅女人，當佢哋知道老公/男友去睇咸片，輕則跪痰罐/跪豆腐唔准爛/跪玻璃唔准流血；重則分手/離婚收場。當女角喺街上遇到露體狂（七八十年代香港真係好流行），佢哋會尖叫、走，然後返屋企喊幾日，仲悽慘過俾人非禮。

喺呢啲咁嘅「通識教育」下，我一直都以為，女人，係好討厭睇咸片嘅。

當然，Erica打破咗我咁多年嘅「信念」；我當時諗：鬼妹，可能唔同啲呢。

然後，Colette；然後Chloe；然後……

我大大話話拍咗十幾次拖，結論係：我所有女朋友/老婆/SP，100％鍾意睇AV，沒有例外。佢哋從來都只會嫌啲AV「唔夠勁」、「唔夠激」、啲女「唔夠姣」、「唔夠正」；間中都會聽到佢哋話「啲液體好肉酸」、「會唔會好臭」，但係我從來未聽過我任何一個女人投訴，套咸片「咸得滯」。

反而，十個有八個會同我講：「個男主角咁長，會唔會好痛㗎？」可想而知，以為支嘢大就等於勁，又係我哋啲麻甩佬一廂情願嘅FF。（當然，我唔排除有啲女人真係鍾意成呎長嘅丁；但一定唔係norm囉。）

所以，細個嗰陣啲大人成日話「電視教壞細路哥」，其實佢哋係啱嘅。香港電視，教到我哋埋藏晒「享受性愛」嘅心態。

AV女優

講到尾，都要講吓女人嘅。

自從有咗寬頻之後（56k download AV實在太不人道），咸片/AV再無疆界。喺串流技術漸趨成熟嘅今日，想睇AV根本就唔使download，pornhub、thisav之類嘅網站，讓你睇過夠本、J個痛快。偉大之處在於，睇完閂咗個browser（當然最好delete埋history同cache，最最最好就format埋個HDD，如果你真係咁慄咁𢯎底）就了無痕跡。左青龍、右滑鼠，輕輕的我J了，正如我輕輕的來。

資訊發達，對AV嘅了解就越嚟越多，大家亦都開始按照自己嘅喜好、追捧自己喜愛嘅女優。

喺八九十年代，好多喺戲院上映嘅咸片，你係唔會知道出演嘅女優姓甚名誰。有時候，你甚至唔知道，佢哋係咪打真軍。因為嗰個年代，有好多嘅AV，其實都係「半真半假」 — 即係口交嘅場面係真、但係造愛嘅場面係假。

已故知名女優飯島愛喺佢嘅半自傳《柏拉圖式性愛》中，就有提及過：

做愛可以用「借位」的手法處理，但是口交就沒辦法「借位」了。有時在一天內不得不含入好幾根，我已經沒有心情表現甚麼演技了，而我的痛苦也使我的臉扭曲了。

當然，後來亦都有人證實，飯島愛當年其實都係打真軍，唔喺啲咩「借位」拍攝。對於睇得AV多嘅人嚟講，真造定假造，睇幾分鐘就睇得出，犯唔著甚麼「證實」。至於港產三級片……我好多時都懷疑，究竟個導演扑過嘢未？你啲動作體位，造唔到愛㗎喎！除非一係個男主角條嘢呎幾長、一係就入錯wrong hole咁囉……

（按：韓國就係一個拍假造嘅AV大國，去過佢哋嘅碟鋪帶鋪睇過，你就明我講乜。多產之餘，啲質素亦都流到一個點。）

但係喺呢個年頭，我諗冇任何AV女優可以唔打真軍拍AV。

寫到呢度，都寫咗成四千三百幾字（算係色情文學嚟㗎喇，大家識做啦）；大家仲係咪等緊我拋幾個名出嚟品評吓呢？

既然係咁：

過期嘅：

白石 ひとみ、日吉亜衣、朝河蘭（武藤蘭；呢個經典，兩年516部AV，即係唔計M嚟同星期日，每日拍一部）、松島楓（唔係松島安）、Tera Patrick（當然有鬼妹啦）。

（蒼井空不在名單之列。講嚟講去，佢咪又係得一套「小公主」叫做睇得吓。）

近期嘅（有啲都可能退咗休）：

Julia（長期至愛）、君島みお（近期至愛）、椎名由奈（女人味濃）、大橋未久（啲戲好到肉）、RION（身材不敗）、本庄鈴（青春可人）。

我唔係孝子，所以冇seed；但我老母年事已高，所以都係我頂。