錶你有冇？

繼續「男人的浪漫」系列技術文

起題嗰陣諗起，小學雞時代、大約五六年級，嗰陣啱啱開始受《玉郎漫畫》影響，成班同學仔個個好似甘小文上身咁，無厘頭會互問對方「錶你有冇？」，然後伸條脷出嚟，答「我條脷冇毛！」。

個笑話好爛，我知。

之前應承過大家會寫錶，家陣找數。唔係就咁求求其封兩皮找數，我仲將佢分做上下集咁找；算係咁啦。

寫錶其實係有啲危險嘅嘢，同寫衫一樣，會有機會預到啲看破世情嘅「高人」，走嚟挑吓機、擺低句「時間同錶嘅價值無關」、「時間比錶重要」之類嘅三毫子哲學。你知啦，個個聽完首《陀飛輪》都係人生哲學家。嗱，唔好，ok？你唔鍾意睇嘅，back page返出去就得；你唔可能說服我，我亦冇打算說服你。更何況，我真係唔會花時間同你討論呢啲哲學問題，我只會直接block鳩咗你冇眼屎乾淨盲。

冇錯，我冇品，但我快樂。

如果大家覺得我寫得唔好、講得唔夠詳盡、或者你有相反意見的話，歡迎你寫一篇文章出嚟大家研究吓。

頭盔：錶嘅mechanism的確好複雜，我呢篇唔係技術討論文，所以我只會以最layman、最容易理解嘅語言去寫，希望大家睇得明白。

好，入正題。

我最近開咗個Telegram Channel，專門推送我喺Medium或者任何地方寫嘅文章。雖然我暫時冇離開呢度嘅打算，但世事嘅嘢真係好難講。歡迎大家加入我嘅《IF 文章 PUSH》channel：https://t.me/ifpush，咁樣大家就可以以最快嘅速度、獲得我嘅文章更新推送；感謝大家嘅支持。

首先，我嘅小學教育話我聽，「錶」嘅正寫應該係「表」。我喺其他嘅幾百篇文章中，都係以表代錶。但係呢篇文，我希望用個錶字；只此一篇、下不違例。

我一直都認為，一個男人，除咗之前講過嘅「一世人一定要有一套西裝」之外，其實仲應該要擁有一隻別名「機械錶」嘅自動錶（Automatic Watch）。

唔一定要貴錶，一隻兩百幾歐嘅精工已經足夠；但一定要擁有一隻自動錶。

因為只有自動錶，先可以稱得上「可靠」 — 無論你去到邊，唔使叉機唔使陽光，只要你戴住佢，佢就會不停運作（唔好問我隻錶壞咗點囉）。一隻好嘅自動錶，可以幾十年不停運作。喺外國，自動錶好多時都係一代傳一代嘅家傳信物。

自動錶嘅起源，最早可以追溯到十八世紀。只不過，當時嘅「自動錶」所指嘅係陀錶，而唔係腕錶。最早嘅自動手錶於二十世紀二十年代面世，為時仲未夠一百年。

自動錶嘅原理好簡單，但構造就非常複雜。一隻普通嘅自動錶機芯、如舉世聞名嘅ETA 2824（或者Sellita SW200），就有接近一百件部件。等閒嘅一隻IWC或同級萬年曆，就隨時有幾百件部件。用簡單而比較容易理解嘅說話嚟講，擺陀將手腕日常郁動嘅動力用游絲「彈弓」儲存起嚟（即係上鍊），經齒輪傳送到擒縱裝置，然後裝置將動力變成有節奏嘅「脈搏」，以擺輪去調節時間，再喺錶盤上顯示時間。

聽落唔難，但要做到「遲唔會遲、早唔會早，中狀元救老母，時間啱啱好」（七十後嘅我當年日日聽住呢首「樂都錶」廣告歌），就非常困難。所以，一般嘅自動錶、如上述使用ETA 2824或同級機芯嘅自動錶，每日就可能會有30秒至一分鐘不等嘅誤差。想要一隻誤差最少嘅自動錶，你就要記住呢個字：

Chronometer

嗱，Chronometer同Chronograph（計時碼錶）睇落就好似，但兩樣嘢嚟㗎。Chronometer可以係Chronograph、Chronograph都可以係Chronometer，但兩者之間冇必然嘅關係。

Chronometer，即係「精密時計」。呢個名唔係你話想用就可以用，因為呢個係一個由瑞士官方天文台（Contrôle Officiel Suisse des Chronomètres；COSC）認證嘅ISO 3159國際標準。

講開天文台錶，我覺得，如果將「COSC認證」嘅錶稱為「天文台錶」，其實有誤導之嫌嘅。事實上，COSC並唔係天文台。「天文台錶」呢個名詞，狹義嚟講，係指經由真正天文台（一般指Neuchatel同日內瓦天文台，歐洲其他國家部分天文台都有呢種認證）檢測同認證嘅「Observatory Chronometer」。自1973年COSC成立之後，其他天文台認證嘅錶就變得少之又少。呢個亦都係COSC被人詬病嘅原因之一 — 因為比起Observatory Chronometer，COSC嘅認證冇咁嚴格。

而「天文台錶」呢個名詞喺華語社會，就變成約定俗成；即係COSC認證。因為咁嘅關係，COSC就「被天文台」，變咗「瑞士官方天文台」。

但點講都好，COSC仍然係高級自動錶嘅標準。事實上，年產量高達三千萬隻嘅瑞士手錶，只有大約3％有COSC嘅認證。

手錶要經過十五日嘅連續測試、喺唔同嘅五個位置及三個溫度（攝氏8、23、38度）之下符合七個標準，先至可以通過COSC認證、叫做「Chronometer」。呢七個標準係：

• 每日平均頻率
• 平均偏差頻率
• 最大偏差頻率
• 垂直及水平偏差頻率嘅差異
• 唔同位置之間嘅最大偏差頻率
• 唔同溫度嘅最大偏差頻率
• 開始同結束測試時嘅偏差頻率

「咁即係有幾準？」

非常壟統咁講，每日嘅誤差，唔可以超過十秒（慢四秒、快六秒）。

每日有86400秒，一隻自動錶只可以唔超出-4/+6嘅誤差範圍內；其實呢個係幾嚴苛嘅標準。同時亦都解釋到，點解一隻坊間稱為「天文台錶」嘅Chronometer，郁啲都過萬港紙 — 鐘錶本身已經係一種精密工業，如果要做到上述嘅準確度，咁零件嘅規格就要非常嚴謹。製造呢啲咁精密嘅零件，並唔係求其搵間大陸工廠量產就可以搞得掂。

更何況，喺鐘錶業，「瑞士」呢兩個字，亦都唔係你喺瑞士開間廠仔、然後幫隻錶做最後嘅「貼牌」加工，就可以自稱「Swiss Made」。根據瑞士法例，一隻「瑞士製造」嘅手錶，必需滿足下列條件：

• 瑞士機芯
• 手錶於瑞士裝嵌
• 於瑞士作最後測試
• 最少60％生產成本來自瑞士

而「瑞士機芯」嘅條件：

• 於瑞士裝嵌
• 於瑞士作最後測試
• 最少60％生產成本來自瑞士
• 所有組件以價值計、50％以上係瑞士製造，唔包括裝嵌成本。

呢度亦都解釋咗，點解一隻Swiss Made嘅Chronometer會咁貴，而貴得嚟又咁襟。只要有適當嘅保養，一隻瑞士製造嘅自動錶，真係可以用一世、甚至代代相傳。

所以，一聽見「靚錶」、「瑞士錶」就將佢哋歸類為「虛榮」、「炫耀」、「有錢冇埞使」，其實係對瑞士鐘錶業呢種精密手工藝嘅侮辱 — 有人鍾意好似《安樂戰場》嘅黃光亮咁、戴隻金勞嚟「左手伸一伸、貴過你全身」，唔代表所有戴靚錶嘅人都係虛榮。七百幾萬香港人有二百萬上街，唔代表其餘嘅都係支持政府。咁簡單嘅道理，冇難度吖嘛？

咁Chronometer係咪自動錶嘅最高標準？

唔係。

喺瑞士錶當中，真正嘅最高品質保證，叫「日內瓦印記」（Geneva Seal）。日內瓦印記嘅標準，比COSC Chronometer複雜好多，牽涉嘅大部分都係有關鐘錶技術上嘅嘢、同埋零件嘅spec；所以，我就唔喺呢度列晒出嚟喇。簡單而言，日內瓦印記有四項保證：包括原產地日內瓦保證、精準度保證、專業技術保證及耐久度保證。

日內瓦印記同COSC嘅Chronometer最大嘅分別，就係COSC會認證石英錶（標準同自動錶唔同），但日內瓦印記只會認證喺日內瓦市範圍內製造嘅自動錶。

比較著名、生產日內瓦印記手錶嘅品牌，有卡地亞（Cartier）、江詩丹頓（Vacheron Constantin）、蕭邦（Chopard）同埋Roger Dubuis。留意返：同樣係殿堂級嘅柏德菲臘（Patek Philippe）喺2009年開始，唔再係日內瓦印記品牌 — 佢哋自創咗一套比日內瓦印記更高嘅標準，叫「柏德菲臘印記」（Patek Philippe Seal）。

另外一樣要留意嘅嘢係：上述品牌都有生產日內瓦印記手錶，但唔代表所有佢哋嘅產品都有日內瓦印記；Roger Dubuis除外。

究竟一隻日內瓦印記嘅自動錶要幾錢呢？

冇大家想像中咁貴。

Roger Dubuis係全球唯一一間100％生產日內瓦印記手錶嘅鐘錶品牌，一隻入門級嘅Roger Dubuis Excalibur 42mm全鋼自動錶，盛惠13000歐元 — 話晒都十幾萬港紙，聽落好似好貴，但當一隻勞力士嘅GMT Master II都要成萬歐、一隻地通拿閒閒哋去到接近二萬歐嗰陣，一隻日內瓦印記嘅自動錶13000歐，性價比其實好高。同樣係日內瓦印記嘅Richard Mille，掂吓都五萬歐起錶。

呢點亦都係我唔鍾意買勞嘅原因：雖然勞力士無論機芯同鋼水（同一般鋼錶使用嘅316L唔同，勞用嘅904L鋼唔講其他，淨係車鋼用嘅機器已經唔同），都係上佳之選，但個價亦都太貴。當全世界大部分嘅名錶都仲講緊有折扣，勞力士嘅「炒價」實在令我卻步。

講自動錶，就一定走唔甩要提及「自家機芯」（In-house Movement）同「ETA」呢個永恆爭議。

故名思義，自家機芯就係錶廠in house生產嘅機芯；而ETA，就係Swatch集團旗下、瑞士最大錶廠ETA嘅代工機芯。每講到呢個topic，一啲自動錶新手或者snob，就會將使用ETA機芯嘅品牌，踩到變地底泥。佢地嘅理據好簡單、亦都好無知：

「我俾咁多錢出嚟，買隻價值一兩百鎂嘅機芯？」

人無知、便無敵。喺佢哋眼中，ETA機芯就只得一種：ebay正貨售價約200鎂，廠價可能只係一半，只有Swatch呢啲cheap錶先會用。於是，所有用ETA嘅廠都係「呃錢」、「搵笨」。

做人不要太藍絲，ok？

事實上，絕大部分嘅瑞士錶，都唔係自家機芯；差在係ETA呢個「少林寺」嘅產品、定係好似Audemars Piguet咁，用Jaeger-LeCoultre（JLC）機芯。

代工機芯爭論最實在嘅一點，係某啲錶廠所選用同改造嘅ETA機芯，質素參差不齊。Fashion Label出產嘅自動錶固然係攻擊目標，事實上佢哋所採用嘅ETA 2824、Sellita SW200或者Miyota 9015之類嘅規格亦只屬基本，但索價不菲。一隻早期嘅Chanel J12，一開口就三萬幾港紙，但質素一般。另外，喺Co-Axial系列之前嘅Omega Seamaster系列所使用嘅ETA機芯，故障率亦高；所以，好多人就將ETA同垃圾之間，加咗個等號。

我理解呢個睇法，但覺得咁樣睇嘢太以偏概全。

要了解代工機芯，首先要了解點解會有錶廠使用ETA機芯。正如上文所講，鐘錶業係精密工業，要研發一隻「自家機芯」，其實係好龐大嘅工程。Omega喺廿年前決定棄用已經沿用多年嘅ETA、開發自家Omega 9300同軸擒縱（Co-Axial）機芯，所花嘅研發費用，就高達一億瑞士法郎。然而，就算係自家機芯，Omega 9300喺2015年前，都仍然係由ETA代工生產。

一億瑞士法郎、十年嘅開發時間。老實講，唔係好多品牌可以花得起呢個投資同時間。Omega當然可以，因為佢背後有財雄勢大嘅Swatch集團撐腰。

可想而知，要完全獨立生產自家機芯，成本效益同技術困難係兩大難題。一億瑞士法郎嘅投資，可以係搵人做R&D、然後起廠、創作自己嘅自家機芯。亦都可以用嚟大幅改進ETA 2824–2、呢隻地球上最廣泛使用嘅瑞士機芯 — 反正就算花咗一億瑞郎去研發，Omega Co-Axial系列仍然經常俾人認為係「同ETA冇乜分別」、「抄襲多過創作」。

事實上，聞名如IWC、蕭邦、Tudor、Breitling、TAG Heuer、Panerai（2016年前）、浪琴、Oris、天梭、Hamilton、Rado、德國名品Sinn等等等等，都仍然使用緊ETA 2824、Valjoux 7750或同級機芯（當然佢哋亦有自家機芯）。只不過，ETA/Valjoux嘅同款機芯有好多等級，上述品牌使用嘅，絕對唔會係二百鎂級數。而且，佢哋使用嘅ETA 2824–2/Valjoux 7750，都係經過大量嘅改造同埋更換、加入零件（例如加入平價版7750冇嘅Column-wheel/導柱輪）；否則，尋常嘅一隻2824，又點可能過到COSC嘅測試？

一隻IWC嘅79320機芯（Valjoux 7750改造，IW3777系列）嘅表現，絕對唔會差得過勞力士嘅Caliber 4130（Daytona 116520）。只不過，由於係ETA機芯（Valjoux俾ETA收購咗），所以一直被「睇低」。順帶一提：勞力士「錶神」地通拿，其實都唔係全部自家機芯。喺2000年前嘅16520所用嘅Caliber 4030，就有半隻係Zenith產品；但係從來冇人叉輪廚過16520，因為好多戴緊嘅都未必知。

道理就好似Benz同AMG一樣，你會唔會覺得，AMG嘅車「咪又係Benz，都唔知點解貴咁多」？

另外一個廠商考慮嘅因素就係價錢。自家機芯成本高昂，以Omega為例，之前使用ETA機芯嘅Seamaster chronograph折實價大約係2800歐，當佢哋換咗自家機芯之後，新一代Omega Co-Axial嘅Seamaster chronograph，就要上到接近四千歐嘅價位，Panerai嘅Luminor Marina 1950系列亦都有咁嘅現象。品牌想維持競爭力，就要好似IWC咁、保留一線使用ETA機芯嘅「入門級」系列。

自從Wyman填嘅說教歌曲《陀飛輪》喺幾年前風行一時之後，好多人都聽過「陀飛輪」呢個名詞。但我知道，大部分聽過嘅人，都唔知真正嘅陀飛輪係乜？希望唔好有人當佢係「爆旋陀螺」嘅一種。

陀飛輪（Tourbillon）其實係喺十八世紀末發明嘅鐘錶裝置，呢個裝置主要係俾陀錶用嘅。因為陀錶經常都係垂直袋喺衫/褲袋，地心吸力嚴重影響擺輪嘅速度、令到陀錶有時間誤差。

陀飛輪嘅原理係將游絲、叉式槓桿同埋擒縱系統裝喺同一軸上面運作。陀飛輪係個恆動裝置，喺運行時會不斷旋轉、以減少地心引力所做成嘅影響。由於陀飛輪設計嘅複雜，喺工藝上嘅要求非常之高，製作成本亦都好高。所以，只有頂級鐘錶，先會有陀飛輪裝置。

一隻有陀飛輪嘅錶，據聞準確度可以高達十年+-1秒。

現今我哋日常配戴嘅自動錶，由於唔會經常垂直擺放，所以，基本上唔會需要用到陀飛輪呢個裝置。但正如上一段所講，陀飛輪係個極其複雜嘅裝置，所以，有啲頂級錶廠仍然會製造陀飛輪手錶嚟「省招牌」、以示其工藝卓越非凡。

最平嘅陀飛輪手錶係中國製造嘅，由幾千至幾萬不等；國產「名牌」海鷗嘅陀飛輪手錶，價值約三四萬港紙，但聞說準確度不及瑞士產品。以瑞士錶嚟講，一隻陀飛輪、好似下面條片嘅Blancpain，索價大約廿萬美金。一隻Richard Mille嘅日內瓦印記陀飛輪，市價大約七八十萬美金。

我睇中嘅TAG Heuer Carrera Heuer 02T，價值大約11500歐，係性價比最高嘅陀飛輪。不過，我暫時仲未有擁有一隻陀飛輪嘅心理準備。