中環遊戲（45）
你與我其實熟得很
最初返香港做記者嘅幾年光陰，真係出 trip 出到驚。嗰幾年好似驛馬星動咁，差唔多個個月都要出 trip。近嘅澳門、遠嘅英美，再加埋飛返韓國及去其他城市同 Chloe 見面，嗰幾年可以話係我人生中出入境最多嘅日子。
但係，作為公關，今次去美國，竟然係我第一次以 agency 公關（留意返「agency 公關」呢個身份，唔好問我「乜你喺上市公司冇出過 trip 咩」呢啲咁益智嘅問題）嘅身份陪客出 job。
再加上做咗老細兩年有多，習慣咗乜嘢都有個助手跟尾（Jessica 同 Winnie 好大程度都我個小助手）、萬大事開句聲就有人應機。難怪就算未上機，我都已經開始有種揦手唔成勢嘅感覺。
冇人跟出跟入，固然令我揦手唔成勢。但真正嘅原因，係 Cindy，因為呢個 trip，我哋又再次共對一個星期。
如果你哋仲記得第33集《台北晚 9 朝 5》嘅內容的話，你哋都可能會有種感覺，覺得我同 Cindy 嘅關係，唔止朋友咁簡單；其實，你哋冇感覺錯誤。我同佢的確曾經互有好感。如果唔係礙於我哋同 Chloe 嘅關係，我諗我哋喺好多年前、當 Cindy 被派嚟香港工作嗰陣，我哋已經可能成為一對……
今次呢個 trip，除咗做嘢同應付客人嘅 office politics 之外，仲係個定力嘅考驗 — 對女人嘅定力，從來都唔係我強項。
2010 年元旦晚上，鰂魚涌某酒店大堂。
「謝謝你們今天到機場接我、又陪了我半天。」Cindy 好客氣咁對我同 Winnie 講。「今晚的日本菜非常美味！比在台灣的任何日本菜都更好，謝謝你們的款待！」
「我現在去 business center 替你列印你需要的文件、然後替你去前台設定 morning call；」Winnie 對 Cindy 非常親切。「你們先聊聊，我很快回來。」
「麻煩你。」Cindy 見 Winnie 轉身離開之後，即刻轉台講韓文。「娶到個咁靚咁體貼、又喺工作上咁幫到你手嘅老婆，唔怪得之你好似一啲都冇掛住銀美啦。男人……」
「你使唔使咁講嘢呀？」我啤一啤佢。「我似係啲咁嘅人咩？」
「唔好意思，我玩吓㗎咋……」佢有少少怯。「對唔住呀……」
「咁又唔使道歉嘅，」我答佢。「我都係講吓啫。」
「唔好喇……」佢星星眼望住我。「萬一你玩小氣，我聽日仲要近距離對住你廿幾個鐘，你黑口黑面咁我點算？對唔住哥哥……」佢一邊講一邊鞠躬。
「總之唔會啦！」我冇佢咁好氣。「所以你都唔使繼續 passive-aggressive 喇……」
「唓，踢爆人嘅……」佢扁嘴。「都唔好玩嘅……」
我同佢冇頭冇尾兼冇乜腦咁亂吹咗一陣，然後 Winnie 就搞掂晒啲嘢返嚟。同 Cindy 約好聽日朝早我嚟接佢嘅時間後，我哋就道別、然後揸車返上山（屋企）。
「你個好朋友真係幾靚女喎！」Winnie 喺車上同我講。
「你又想講啲乜呢？」我好醒水咁答佢。「Cindy 真係唔係我個 ex 嚟呢……」
「唔使驚喎，我信㗎！見完佢之後，我真係信你。」還好，佢終於都信。「不過咁，我 feel 到啲嘢，唔知你覺唔覺？」
「Feel 到乜呀？」點解啲女人硬係咁多嘢 feel 到嘅？又唔見你 feel 到你老公其實係國民老公？
「佢好似對你有啲嘢……未必係現在式，但佢應該鍾意過你；」Winnie 輕輕一笑。「你哋識咗咁多年，乜你 feel 唔到嘅咩？」
幸好我真係做咗任何女人嘅男人好多年，所以即使我第一時間唔識得點答 Winnie，我仍然可以將自己嘅靈魂抽離肉體、上下半身唔關事咁答佢一句：「係咩？Feel 唔到喎！佢乜都冇講過……」
「都話你哋啲男人遲鈍㗎啦！講到明就唔係暗戀啦！」Winnie 不虞有詐，佢仲未知佢老公詐傻扮懵功力高絕。「Cindy 點睇都唔係壞女人，再加上佢自己都有家室，又點會亂嚟？！不過，有啲嘢係睇得出嘅，一個女人鍾意過一個男人，無論係過去式又好、現在式又好，點都睇得出嘅；係你哋啲男人成舊雞咁乜都唔知啫。」
乜都唔知就未必，係扮傻有返兩手咁解啫……
「你多心啫，點會喎……」我死撐。「如果係嘅，我同佢結咗婚好耐啦！邊會有你嘅出現喎。」
「唏，一單還一單。你瞓喺我隔籬 BB 兜嗰陣、就整定要娶我㗎啦！」佢傻笑。「不過呢，喺娶我之前，你同 Cindy 可能真係有啲緣份都未定。可能係你太粗心大意、錯過咗啲嘢你自己唔知呢……」
「黐線，點會喎……」我隨口否定佢；但心裏面覺得，佢可能有兩分道理……
不過，我諗我都係要小心啲。Winnie 睇得出嘅嘢，其他人都有機會睇得出。如果俾啲立心不良嘅人、或者同 Cindy 老公有關嘅人睇出咗，咁就唔係咁好玩喇。「是非」喺職場有個別名，叫「人情」。我唔想呢啲嘢俾人放入利是封、然後轉送俾任何有關以至無關嘅人。
一月二日早上，機場，出發。
要應付廿幾個鐘嘅航程並唔容易，所以我帶咗好多零食、書本、iPod 同 160gb 嘅歌，仲有安眠藥，以防萬一。
因為都袋住幾多嘢嘅關係，所以我個背囊都幾重吓。但我估唔到嘅係，Cindy 個背囊竟然仲重過我嗰個！由於佢並唔算太高大，睇住佢孭住咁大個背囊，我戥佢吃力。
「幫我拎住個袋一陣吖……」佢遞咗個背囊俾我之後，就打開個袋𠳕嘢。「我要搵證件呀……」
「嘩，咁重嘅？」我故作驚訝。「你袋晒成個屋企啲嘢去美國呀？」
「一啲啲咁啦，咁有用就要帶㗎啦……」佢一邊講、一邊用隻手 feel 緊裏面嘅物品係唔係佢嘅證件。「我聽小美講過，你搭飛機好麻煩，瞓唔著的話，又會周圍搵嘢食。為免你借機撩空姐，所以我帶咗啲鳳梨酥同牛肉乾之類嘅零食，萬一你瞓唔著扭計，都唔好煩到機師要踢你落機。」
我望住背囊裏面隱約見到嘅新東陽膠袋，突然間有種莫名嘅感慨。我諗返起，02 年佢嚟香港做嘢嗰陣，我陪佢去出電話、租屋同 settle down 嘅種種往事……
由於佢要排隊過關嘅關係，我陪佢一直排到就到佢過關、我先至經e道過關。所以，我都有好一段時間喺度胡思亂想。
雖然話，Daehwa 香港今次肯俾錢我出 trip，經已係好闊綽嘅一件事；但始終呢間公司都係孤鳩寒慣，所以就算我同 Cindy，都只不過係搭經濟艙。聽聞全個 Daehwa 香港，就係得最高領導人可以搭 business。
但有樣嘢唔可以唔讚吓我老婆：自從佢知道我無啦啦要飛東岸轉機、再飛返西岸之後，佢就好上心咁、日日哦領事館。呢個世界上，俾公關捽已經係好甩皮嘅事，俾公關 + 人妻捽就絕對會死人。結果領事館出面，幫我同 Cindy 向航空公司攞咗來回嘅 exit seats。呢個位喺未有 premium economy 之前、係經濟位嘅最佳位置；我同 Cindy（主要係我）起碼有足夠嘅 leg room。
飛機起飛，當我正想話拎部 iPod 出嚟塞住對耳嗰陣，Cindy 拍一拍我、然後同我講：「唔好咁悶啦你，不如陪我傾吓偈？」
我點頭，佢拎咗包牛肉乾出嚟，我哋一邊食一邊傾偈。
「仲記唔記得呢樣嘢呀？」佢喺衫袋拎咗啲嘢出嚟。我一睇，係部 Nokia 8310。
「記得，我送俾你嘅手機嘛；」我笑一笑。「咁多年都仲 keep 住？點解無啦啦帶埋嚟出 trip 呀？」
「我仲有用佢㗎！不過係用嚟養住我個韓國號碼之嘛！」佢摸一摸部飽歷風霜嘅 Nokia。「當年嚟到香港，先發現所有嘅卡都用唔到，香港銀行唔支援四位數嘅密碼，連 credit card 都碌唔到，又用晒啲現金。如果唔係小美幫我搵你，我都唔知點算。一個人人在異鄉、人生路不熟，都唔知去邊搵人救我……」
「咁又冇咁危險嘅，」我答佢。「香港治安咁好，最多咪餓你一兩餐，你總會搵到屋企人救你嘅。」
「講就係咁講，但身在其中嘅感受，就冇可能咁簡單同理性；」佢望住我。「當日你出現喺酒店 lobby 救我嗰陣，真係好似我嘅 bodyguard 衝出嚟救我咁㗎……」
「錢可以解決到嘅問題，唔使用個『救』咁嚴重喎，」我笑一笑。「你真係冇錢找酒店數的話，佢哋最多咪叫你執返一個月房頂數，冇事嘅。」
「妖！你留返少少幻想空間俾我好唔好？」佢搣咗我手臂一下。「當係做吓好心，留個美好回憶俾我好唔好？」
「咁你喜歡啦，」我仍然唔捨得收口。「再唔係你就當我係 James Bond 囉！」
「妖……」
傾吓食吓，冇幾耐空姐就派飛機餐。食完正餐後，大家都有啲攰，於是過唔得幾耐，兩個都瞓著咗。
上帝對人類最大嘅 mercy，就係賜予人類「睡眠」呢個 function。如果佢 upgrade 咗呢個 function、喺我哋身上安裝個卅分鐘可以叉 80％ 電嘅「快叉」的話，我諗冇咗人生佔三分一嘅睡眠同逃避時間，我哋都幾閉翳，自殺率都可能高幾成。
喺音樂聲同飛機引擎聲交嚮配搭而成嘅 BGM 之下瞓覺，對於我嚟講，真係安穩極有個譜。冇食安眠藥咁瞓吓醒吓，大約過咗兩個鐘左右，我終於完全醒咗。喺我想坐直個人清醒吓、然後飲啖水之際，我發現咗啲嘢：原因 Cindy 攬住咗我隻手臂、好似攬住個攬枕咁瞓緊……
先唔好去諗，我隻手臂一直都同佢個胸保持零距離呢樣咁誘惑嘅嘢，一個姿色唔差嘅女人攬住我隻手瞓著咗，齋呢樣都夠令我心跳加速。
喺本能上，我實在好難抗拒一個靚女咁樣「投懷送抱」；喺道德上，我嘅天使不斷驅使我整醒 Cindy；喺社交禮儀上，你就算抱住隻瞓著咗嘅貓都唔好意思整醒佢，更何況呢個係我嘅好朋友；係文學上，作者寫到呢度，都開始唔知自己寫緊乜……
於是，我決定暫時唔叫醒 Cindy — 呢個純粹從人道立場出發，叫醒一個熟睡嘅人，係非常唔人道嘅行為。而我亦諗住借呢個千載難逢嘅機會，好好咁抽吓佢水 — 我意思係，好好咁欣賞一下佢嘅美貌。
咁多年嚟，我一直都覺得 Cindy 個樣，有啲似宋玧妸（宋允兒）；難得嘅係，咁多年嚟，歲月並冇喺佢面上留下太大嘅痕跡。既然呢次有機會零距離睇真啲，我當然唔會錯過。
當我正在細心欣賞佢嘅面容之際，一滴淚珠劃過佢嘅面上；但我好肯定，佢仍然熟睡中。
唔通發惡夢？
然後第二滴、第三滴。淚珠喺 Cindy 嘅面上，串連成淚痕。當我開始考慮、應唔應該叫醒佢之際，佢開始喊出聲；哭泣聲中，夾雜住一兩句唔完整嘅韓文「 하지마 」（唔好呀）。
如果係發惡夢的話，我覺得我有叫醒佢嘅必要，於是我輕輕掙脫佢攬住我嘅手、然後輕輕捉住佢嘅手臂、輕輕搖醒佢。
點知，當我搖佢手臂嗰陣，佢猛然紮醒，然後㩒住隻手。
「你冇事吖嘛？」我好關切咁問佢。「唔好意思，我太大力，整痛咗你。」
「唔關事……」佢下意識抹一抹面上嘅眼淚，但隻手舉高又縮返，似係受咗傷。「唔好意思呀，我係咪嚇親你？」
我擰頭，然後指一指佢隻手問佢：「你隻手……係咪受咗傷？」
佢冇答我，但係眼淚再次湧現。
良久，佢再抹眼淚，然後好平靜咁同我講：「喺我離開台灣去香港搵你之前，我同我老公鬧咗場大交，佢……佢打我……」