一份信念從3年前開始

鐘意一個人，其實唔一定因為對方十全十美。有時候，就恰恰係對的時候，緣份開始。然後因為鐘意咗佢，令到自己變得更好，就會更加鐘意佢。

「偶遇」飛鳥嘅原因提過太多次了，鐘意佢嘅地方要深入咁講又太長篇大論，鐘意佢係咩時間反而好似無乜提過。原本我都唔係好為意呢個重點，直到今晚睇完佢嘅畢業con，我突然明白到，原來呢個偶像嘅出現，支撐住我二字尾到三字頭嘅轉折，令我喺一段重新探索嘅旅程入面，心靈有所寄託。

6、7年間，生活中每方面都出現咗啲激烈轉變，接二連三嘅連鎖效應，又未去到無所適，一路都覺得自己頂住無問題，但原來心裡面一直有一個可以毫無防避、卸下自我枷鎖嘅位置，每次有壓力嘅時候都可以進入呢個避風港。哪怕重睇過同一個片段無數咁多次，都可以令到我忘記所有煩惱，隨意嘅笑同喊。呢個位置，呢個人，就係齋藤飛鳥。

當年白石麻衣宣佈畢業，Covid仲未爆發，大家都預計會搞個畢業con畀佢。喺嗰一刻我就同自己講，當飛鳥搞畢業con時，我一定要去現場參與。其實我中意乃木坂，中意齋藤飛鳥，但係我之前一次Live，一次握手會都未去過，一張生寫都未買過。相比起其他乃粉，我可以話完全唔合格，甚至要零分重修。雖然係咁，但每次同同事、朋友講起乃木坂，講起飛鳥，我都會講到：如果佢真係畢業開演唱會，我一定要去現場睇一次。

上年年尾，飛鳥宣布畢業，但畢業con一直都無消息。未買過生寫嘅我，即刻上官網開個account，然後買好咗一堆畢業相關嘅周邊，當中包括兩set至關重要嘅postcard。根據兄弟教路，買嘢珍藏最好買兩set，一set收好，另一set就可以拎出嚟欣賞。因為買咗兩set，一set有640張左右，於是我4月底收到postcard貨後，就麻煩同事幫我集運埋淘好咗嘅postcard相簿。3月中時，終於有飛鳥畢業con消息，5月17-18日喺東京巨蛋舉行，官網隨即出咗一堆演唱會周邊。當時嘅我無辦法開通mobile會員，根據網上消息，多數都只會得返兩成左右嘅飛會公開發售。喺未secure到飛嘅情況下，我都照買咗周邊先，因為我唔想搶到飛嗰陣兩手空空咁去現場。有啲可惜嘅係，我搶唔到推巾，唯有先買另一個成員嘅，到搶到飛時去秋葉原諗吓辦法。

當準備好周邊嘅時候，身邊幾個好友send咗個訊息畀我，話EGL有package包埋畢業con嘅飛！其實我都一早留意到，日日刷官網消息但係完全無料到。到5月頭時再去水EGL FB睇先見到當日3點有個post，話第二輪package當日5點開賣。第2輪？第1輪去咗邊呀？睇返啲字，話有粉絲第一日收到風就Call咗EGL一個鐘就賣哂。講真哪怕真係有個咁嘅電話你唔講出嚟好L過啦，講完真心覺得分豬肉分到咁嘅食相真係好核突囉。(Sor我嗰陣真係㷫到爆) 到5點梗係乜9日期都click唔到啦，連申請定會員都load唔到。不過唔緊要仲有最後一轉日本樂天瘋搶。

當過咗EGL第二轉公開發售之後，星期日嘅《乃木坂工事中》宣布5月6日樂天賣飛，一聽到嗰吓我就預咗5月5號返TKO度過夜第二朝搶飛。點知5月5臨收工前，同事話postcard相簿到咗公司，問我拎唔拎返去。嗰吓一聽到，我又同自己講，只要今晚入好哂一set postcard，第二日就會搶到飛。結果我就夜晚8點入到去12點半，然後擺好個陣set好哂機第二日搶飛。

5月6日11點，正式開放搶飛網站，今次真係最後機會無退路可以走。2部laptop，2部iPad，1部電話瘋狂F5，每次唔係Error 502就係504，中途直頭右手肌肉抽筋要轉手繼續。本身以為又會好似EGL咁死哂網，點知1點20分嘅時候，我見到5月18號個status係賣哂，即刻轉去5月17日條link狂Ctrl + click狂開分頁，然後見到tab啲標題係日文字！轉眼間將準備好哂嘅資料copy & paste完成購買手續！到見到Email confirmation嗰一刻，我個心跳得勁快，第一個反應就係拎起電話，打畀一個係呢個時刻無比重要嘅人。

「老闆，我要5月15嗰個星期嘅假！」

2023年5月17日，我終於去咗乃木坂，喺月台錄咗電車關門嘅鈴聲。去咗乃木神社，睇咗飛鳥同其他成員寫嘅繪馬。我入咗東蛋，終於睇咗我人生中第一場嘅乃木坂Live，亦都係我心入面最重要嘅一場Live。當我坐到去山頂第二行，見到一個個白色衫嘅人仔喺個台度跳住舞唱住歌，只係第一首歌，我已經流哂眼淚鼻涕，呢個係完夢嘅感覺。對上一個令我有同樣感動嘅感覺，其實就係大學畢業無耐，喺迪士尼城堡前面睇煙花。無錯，就係咁簡單。因為我出世廿幾年都未去過迪士尼，中學時聽同學提過就好期待，到親身睇見到同聽到嗰句「I can show you the world」我就流晒眼淚。

五年前嘅我人喺轉變不安時陪住我渡過，到今日對生活有啲迷惘嘅時候，我又從佢身上得到一份感動。有時就真係咁啱，就係呢一個人中咗呢個時機，又係喺需要一啲鼓勵激情時同一個人又出現喺你身邊，就好似冥冥中佢就係你命中的一粒星，陪你走過黑夜與寂寞。

雖然18號先係正式最後畢業日期，可能畢業後少咗機會喺電視見到你，但憑住我翻睇又翻睇得嚟嘅記憶，你永遠都會喺我嘅腦海裏面，成為我最珍貴嘅回憶之一。

飛鳥さん、ありがとうございました！