七日書 | 我的家庭故事 | 2025年3月7日 | 第五天 | 虛有其名，名存實亡

二十多年前，作為女兒的我，早就從最近身的角度見證父母婚姻越趨冷淡而出現的裂紋。

我小學的時候，有位一起玩的同班同學忽然間轉她姓氏。她淡淡然向我說：「我父母離婚啦。」吓！原來父母可以離婚㗎？忽然我意識到我父母也有這個可能性。

某次父母吵架後，我望見一邊是氣紛紛的爸爸在光猛的廳，另一邊是哭泣不停，屈膝於心口、坐在暗黑主人房地下的媽媽。再望爸爸逐漸下氣，我走去媽媽，跪在她旁，拍她背脊。背後我聽到一聲冷漠言語傳過來：

你始終都你阿媽個女。

我背付著一箭穿心的痛，默默安慰需要我安慰的。

到我中學時，我召開家庭會議，以問答兩性、關係的會。我問，父母答。

你點樣維持婚姻關係？

當中有個答案耐人尋味。

婚姻耐咗就係會淡㗎啦！

我出嚟工作多年後，某次一家人見到家庭治療師，番出他們多年嘈交圍要住的題目，深一層、多一兩層的核心：權力鬥爭。誰掌握最後話事權。我有冇授權你。有沒有溝通，清晰表達授權或沒有授權的意思。哪些情況必須要互相諮詢。在互相沒有預先溝通之下，沒有共識，而嘈了十幾廿年。「唔使講，佢都知我諗乜㗎啦！」

他們似風化咗嘅石壁。石壁在海邊經長年歲月的風雨吹打，出現有無數的小裂痕。石得一邊與另外邊石漸漸被磨蝕，距離越嚟越遠，越多罅隙，支撐力也越嚟越弱。到某一天，支撐不了的時候，整捧墻就冧下來。從此就石沉大海，破碎，沒有彎轉之地。