中環遊戲（39）

Protégé

Protégé，其實就係「門徒」、「學師」，唔係乜嘢新奇好玩又刺激嘅嘢，就算喺香港，亦都歷史悠久。其實我可以用中文嚟做副題；不過，有型嘅嘢用外語嚟講，特別有型啲。

無論做記者又好、做公關又好，呢十年嘅日子，我都有過唔少門徒。最早係跑財經嗰陣，帶過兩三屆 intern；至於公關，其實，我亦都教過唔少人、栽培過唔少門徒。

唔係任何我教過嘅人，都可以叫做我嘅門徒；喺呢十年嘅香港歲月中，真正稱得上係我門徒嘅，不出三四人 — 冇錯，樓上所謂「唔少門徒」，就係得嗰三四個咁大把。呢三四個人，當日我係傾囊相授。若果你話佢哋盡得我真傳，我唔會反對。

香港有句俗語，叫「教識徒弟冇師傅」；我從來唔信呢套，所以教任何門徒，我都冇保留。我亦從來冇諗過，他朝有日要面對門徒對自己嘅進逼。

但係如果有呢一日的話，其實都幾大鑊……

Daehwa event 之後嘅星期五上晝，office。

「……雖然，我從未正式成為 PR Manager 或者 Account Manager；」坐喺我面前嘅係 Winnie 以前個 assistant Charlotte。「但係喺過去嘅一年多，公司嘅 PR and marketing projects，都係由我去負責。由 strategic planning、寫 PR plan、budget forecast、到 execution、onsite support，都由我一手一腳搞掂。我有信心，我可以勝任 Account Manager呢個位置，為公司出一分力！」

Charlotte 同外面嘅三個女人最唔同嘅地方，就係比佢地任何一個，都高出半個頭以上。根據目測，佢絕對唔矮得過 Chloe 同 Patricia，件頭同後者絕對有得揮。佢同我一樣，都係中西混血兒，不過佢係 Hispanic。同 Winnie 一樣，都係語言系畢業，所以中英西三語能力良好。

可以講，佢絕對 qualified。

「我諗 Winnie 都應該同你講過，我哋呢個職位嘅主要職責，係負責 Daehwa Hong Kong 呢個 account；」我同佢解釋、佢不住點頭。「我要先旨聲明，Daehwa 呢個客，係要求好高、俗啲講係幾麻煩嘅客戶。我要知道，究竟你喺應付麻煩同無理嘅客人嗰陣，會唔會……覺得壓力太大、handle 唔到，或者容易發脾氣之類嘅負面情緒。」

「放心，其實我父母都係好麻煩嘅人，我都應付咗咁多年，」Charlotte 傻笑。「呢幾年嘅 in-house 生涯，我都面對過好多橫蠻嘅 vendor 同 partner，我都可以一一應付。我覺得，好似 Daehwa 呢類跨國企業，佢哋要求高係必然，我有信心可以應付得到。」

呢個時候，房外邊傳出一聲巨響，係掟電話聲；然後再跟尾一聲「妖！」，係 Winnie。佢喺佢房掟電話同妖人，我喺呢邊房閂埋門都聽到，十號颶風訊號現正生效……

「其實我哋公司同其他 agency 唔同，好 easy going 嘅，」我笑笑口幫 Winnie 解釋。「喺客人背後，講粗口鬧客同掟電話都絕對可以接受；你舊同事啱啱示範咗俾你睇。」

「連 Winnie 咁斯文都撻得著，你個客人都好強橫吓喎！哈哈！」Charlotte 傻笑。

我哋傾多咗一陣，然後我送 Charlotte 出去，應承佢下星期我有決定後會通知佢。之後，我入咗 Winnie 房，睇吓風災嘅損毀程度。

「冇事吖嘛你？」我慰問災民，呀唔係，係颱風本尊。「乜事咁勞氣呀？」

「你個好下屬 Rachel 呀！正一死八婆！」颱風 Winnie 目前集結在觀塘上空。「玩完呢樣就玩嗰樣，家陣佢好寂寞、冇人陪佢玩呀！臭八婆！」

大家仲記唔記得我個鬼妹 ex Colette？佢當年對我嘅「好朋友」Erika 嘅稱呼，係分級制嘅，而家 Winnie 對 Rachel 都係。通常喺「Rachel」之前加上「你個」，經已係雷暴警告；如果加埋任何同「八婆」有關嘅助語詞，就係災難應變警報。

講開又講，八婆咪得囉，加個臭字就 out 㗎喇。當然，我唔夠膽講出口，生命誠可貴嘛。

「佢又點激嬲我哋馮太呢？」我撚起把𠱁女聲同佢講。

「個八婆以為自己揀緊老公呀！乜都玩得一餐、乜都彈得一餐！」佢仍然憤憤不平。「揀 model 揀幾轉都算喇，又嫌人哋唔夠 high class、但又只係肯俾五舊水一個，咁就梗係得 MK 妹啦！揀 model 衫又係，兩舊水 budget、唔係金都貨色我都唔知俾乜佢，但又嫌人哋 cheap！揀咗四轉都未揀得掂！」

「唔好勞氣唔好勞氣……」我繼續𠱁女咁𠱁。

「我未講完呀！擺 booth 咪擺 booth 囉，咩色檯布關你叉事咩！」㷫過焫雞嘅佢完全收唔到。「又要學人揀檯布色！你都冇 corporate color 學乜嘢人揀色唧！啲 backdrop 台燈聲，佢衰到要睇單開數呀！邊度會有人 cheap 喱到唔俾人 mark up 㗎！我幫佢出住先唔使息呀？你點同佢傾份 retainer 㗎？！個八婆又腌尖腥悶、又鍾意打死狗講價、錢又俾唔起、要求就好似人哋搞 Met Gala 咁高、錢又唔俾我賺，咁佢玩晒啦！我唔使食啦！」

「或者你等我同佢傾吓啦……」仍然𠱁女，不過我越講越細聲，因為擔心火勢太猛、燒埋我數簿……

「咁嘅死 cheap 喱都做到 marketing manager！都唔知邊 Q 個教個咁嘅人出嚟……」Winnie 開始有收火嘅氣息。

「Errr……errr……點知人哋咁多喎……」我有啲心虛。

「揀衫要睇裙襬、揀檯布要襯色……」Winnie 用好懷疑嘅眼神望住我。「完全知道晒啲 agency 喺邊啲位 mark up、先發制人等人哋冇啖好食……點解呢啲嘢咁熟口熟面嘅？」

「係囉呵？點解呢……」我扮傻。

「係喎，人哋跟住馮總監搵食好多年喎！我差啲唔記得𠻹……」佢露出一個好兇狠嘅笑容望住我。「得力助手兼紅顏知己咁話喎……」

「年零啫年零啫……」我支吾。「紅乜鬼嘢顏吖，幻覺嚟啫！唔好講到我咁重要先得㗎……」

「係你！係你個屎忽鬼，只有一個出色嘅屎忽鬼，先可以教出另一個咁出色嘅屎忽鬼！」佢指住我個鼻。「人哋係你愛徒吖嘛！你老闆！繑晒手去食爆房拉麵吖嗱！你老闆吖！教曉徒弟冇師傅，人哋而家用你教嗰套嚟耍你老婆呀，屎忽鬼！好教唔教教埋啲咁繑口巉手嘅嘢！你同我搞返掂佢呀！」

「我盡吓人事啦……」我唔知可以點搞。「人哋家陣又唔係打我工……」

「唔係打你工就唔使搞呀？！個好徒弟你教出嚟㗎！」Winnie 得勢不饒人。「你咁識𠱁女，人哋實聽晒你話啦！你咋咋𣺉幫我搞返掂佢呀！如果唔係我唔煮飯呀！你晚晚食茶記啦人哋個好師傅！」

「得得得！我搞我搞！」我投降。「我約佢出嚟教訓吓佢！」

「你約還約呀，我叫你搞返掂壇嘢咋，唔係叫你搞佢呀！」識佢咁耐，最好火呢次。「你再俾我撞見你同佢有任何身體接觸，你嚟緊一年都唔好掂我、唔准入房瞓呀！」

「放心，齋講、唔搞，ok？！」我寫包單，佢點頭。

死八婆何詩婷，出到嚟你就知死！

同日晚上八點，加太賀。

「馮老闆，做乜咁好死約我出嚟食飯呢？」Rachel 古古惑惑咁望住我。「係咪俾人罰冇住家飯食呢？嘻嘻！」

「如果一陣我推你出馬路的話，你而家都就死啦，」我啤住佢。「呢餐咪當同你餞行兼解穢酒囉。」

「少少誤會啫，唔使買兇殺人呀？」佢仍然笑意滿面。

「買兇？我諗住自己出手喎！」我都同佢笑一吓。「唔係點發洩呀？」

「哦，你想發洩啫，容易啦！」佢煞有介事咁伸個頭埋我耳邊講。「食完飯，上我屋企，咪可以盡情發洩囉！」

「你家陣叫做摟我上床呀？」我反問佢，完全不解溫柔 mode。

「唔敢、唔敢……」佢有少少怯，因為喺工作以外，我從未咁認真咁對佢。「你有老婆㗎，俾個天我做膽，我都唔敢勾引你啦！」

專搞人老公/男友嘅「壞女人」我識好多，Rachel 無論點講都唔會喺名單之上，呢點我非常肯定。

「唔使咁樣大興問罪之師嘅，我都係做嘢啫；」佢收起笑容繼續講。「咁 Winnie 做嘢嘅手勢，真係有啲問題，跟嘢又跟得唔清唔楚，所以先會咁啫。」

「哦，做嘢手勢有問題，跟嘢跟得唔清唔楚……」我喺袋拎咗嗰 file 出嚟。「呢疊係你哋過去一星期嘅 email 對話紀錄，來來回會成百幾個，我哋不如拎出嚟研究吓，究竟佢點樣有問題同唔清唔楚？」

「你使唔使攬佢攬到咁出面呀？」佢抗議。

「你話呢？老婆嚟㗎，我唔攬佢攬邊個？」我答佢，順便揭開 file。「條裙個裙襬唔夠飄？你家陣 Stella McCartney 上身呀？你要去 New York Fashion Week 參展咩？」

「……咁嗰條裙行起嚟係唔好睇吖嘛！」佢解釋。

「條裙個 cutting 唔夠飄逸？」我繼續揭 file。「你識分咩係 A-line 咩係 Empire Silhouette 咩？Asymmetrical Dress 同 Halter Dress 喺剪裁上有咩唔同呀？High-Low Dress 呢？又有咩唔同呀？」

「咁……唔識分都唔代表我唔識睇吖嘛……」佢繼續撐。「嗰條裙係唔靚囉……」

「你嗰兩三舊水 budget，我俾條 Oscar de la Renta 你襯埋對 Jimmy Choo 好唔好？！搵到俾你咪算佢叻囉！」我繼續揭。「張檯布隻寶藍色太似海軍藍唔似寶藍？你老闆吖！你家陣轉咗去做 Pantone 呀？識唔識分 Carmine、Crimson 同 Burgundy 呀？」

「咁……隻藍色唔順眼囉……」Rachel 仍然垂死掙扎。「咁我係客，唔通連唔鍾意隻色都唔得咩？」

「嗱，呢個真係賣飛佛喇：個 model 唔夠標緻，可唔可以有啲薛凱琪嘅氣質？」我冇理佢嘅掙扎，繼續𡁻落去。「你俾嗰五舊水一個 job 咋何小姐，薛凱琪？！四肢健全有眼耳口鼻你執到啦！咁恨要薛凱琪，你追加十四萬九千五 budget，我咪幫你 call 薛凱琪囉！大姐，唔係話唔俾你彈鐘呀，你要玩嘢都玩得有水準少少好唔好？！你係我教出嚟㗎，連鐘你都唔識彈呀？！」

坦白講，如果佢唔係焫著 Winnie 的話，我都幾 proud of 我嘅 Protégé 有呢種四方西嘅本領。

「得，我認！係呀，我係唔likey Winnie，得唔得吖？！」佢終於頂唔順，歇斯底里爆發。「我係擺明玩你老婆，得唔得吖？！我係客嚟㗎！」

「我同你講過幾多次，出嚟搵食，係對事唔對人。得罪人多，其實係同自己過唔去……」我嘆咗口氣。「你針對 Winnie 為乜啫……」

「睇住你哋識、睇住你哋結婚，我唔明佢點解咁短時間，就可以做咗你老婆呀！」佢有少少激動。「我喺你身邊咁多年，你眼尾都唔望吓我！你身邊啲女人 chit cheuk 咁轉、你個個星期約你個 fuck-buddy 去開房，我完全冇介意過，點解你咁都唔肯俾個機會我？我想知點解呀？！」

輪到我唔識答佢。

結果，我哋食咗餐好靜嘅飯。

走嗰陣，佢問我：「可唔可以送我返屋企？」我點頭。

成程車都好靜，我車到去佢屋企樓下停低，佢冇即刻落車，冇引擎聲嘅車廂靜到我哋可以聽到對方嘅呼吸聲。大約過咗五分鐘，Rachel 深呼吸，然後問我：

「咁多年嚟，其實你有冇鍾意過我？」

「冇。」我答佢；但其實我唔肯定。只不過，呢個唔係一個應該咁老實嘅時間，否則越描越黑、唔知點收科。

「好多謝你對我咁好、俾生意我做；」我趁佢未開聲講落去，搶先講咗我想講嘅嘢。「只不過，如果你真係覺得，同 Winnie 合作會令你唔舒服的話，我唔會介意我哋 cancel 個 retainer contract。」

「唔使，我冇事。」佢嘆咗口氣，然後輕輕一笑。「好多謝你今晚俾咗個答案我，我明㗎喇，以後唔會再亂諗嘢。返屋企喇，電聯啦，拜拜。」

然後佢落咗車。

喺返屋企嘅車程中，我不斷諗：究竟我同 Rachel 之間，欠缺咗啲乜呢？

我諗我永遠唔會知答案。

另外一個工作日，晚上九點，office。

「外賣嚟咗喇，」我伸頭入 Winnie 房，同做緊嘢嘅佢講。「快啲出嚟食飯啦！」佢點頭。

公關生涯對我哋嚟講，仍然係朝八晚十一（朝八係因為 Daehwa 香港都跟韓國 timezone 快一個鐘）。同其他公關公司唔同，我哋唔鍾意留下屬喺度捱夜，所以得返我哋兩個。

公司嘅業務上晒軌道，我當然高興。但係睇住 Winnie 仲捱得辛苦過佢喺 Soliloquize 嗰陣，實在於心不忍。有時諗返轉頭，覺得真係好好笑：我哋人生嘅過程，就係不斷令自己愛同關心嘅人為自己辛苦，然後就對啲同我哋擦身而過嘅外人好。其我哋嘅造物主，係唔係 Joker 嚟？

喺大家食緊對面酒樓外賣嘅貴妃雞嗰陣，我問佢：「我頭先 check 過，十一月中下旬，我哋應該有一個星期空檔。想唔想去一個星期歐洲補渡蜜月？」

「夠時間咩？」Winnie 充滿希冀咁問。

「夠，連埋飛嘅時間，一個星期內來回就得；」我答佢。「點都起碼有五日玩，好唔好？」佢好開心咁點頭。

我希望，呢啲都算係我對佢日做夜做嘅少少心靈上補償。