點樣分辨警察係唔係「毅進仔」？前人早有解決方法！

（本文以香港粵文創作）

過去幾年，香港警察嘅水平屢創新低，不單單講緊員佐級警員，就連理論上經過大學教育嘅督憲級都一樣。早幾日先有一單法庭新聞，堂堂一個督察係庭上宣誓果時，連誓詞「我謹以至誠……」都讀唔掂 [1]，仲講到明自己唔識讀個「謹」字，連一個高小學生都識嘅字都讀唔掂，實在貽笑大方。

講翻香港警察嘅水平，近年由於大規模招募只有中學學歷甚至毅進文憑 [2] 嘅持有人，2019/20年度招募嘅員佐級警員當中，更加有超級45%僅持有毅進文憑，其知識水平及執法能力可想而知。但係作為「紀律部隊」，著同一套制服，戴同一款超稀有嘅委任證 [3]，就連言語方式都已經同化晒（望望上面果位連「謹」字都唔識讀嘅大學畢業督察~~），根本無從分辨企係你面對嘅警員，佢嘅實際學術水平去到邊......

或者啦，對新一代嚟講或者唔講唔知，過去嘅警察（皇家香港警察）曾經有項制度，明確、清晰咁令大眾得知一個警員嘅學術水平去到邊。年幾之前我亦曾經針對香港警察充斥「毅進仔」嘅情況，寫過一篇提議恢復用舊制度嘅文章。

（無錯，又係一篇舊文，原文刊於《輔仁文誌》，並曾略作修改。）

[1] https://gongjyuhok.hk/articles/5021

[2] 毅進文憑持有人，其學歷等同香港中學文憑（DSE）五科二級成績（包括中、英文），即最最最最基本的「五科及格」。簡言之（雖帶點歧視），毅進文憑只有連 DSE 都沒有五科及格用以升學的人才會考慮。

[3] In case 大家不清楚，近年香港警察（特別是便衣警員）於執行職務，特別喺處理與反逃犯條例有關嘅案件之時，大多拒絕戴上委任證，市民按法律權利要求警員出示時，下場大多慘烈。

早幾日港台《視點31》節目入面，有個李姓退休警司講出著名嘅金句「警察份糧，有三份一值在比市民鬧，有三份一值在比上司鬧」，全城市民無一不拍手叫好，大呼「咁樣先係警察嘅價值」。不過對我嚟講，佢講嘅另一句反而更值得思考：「前面有個警察，你都唔知佢學歷咩野，佢心口無寫㗎麻，咁你點知佢毅進（畢業）呢？」。

啊李Sir，你入職都應該距今有幾十年，或者你唔記得咗，其實你當差果個年代，警察部早就有解決方法，用一項簡單、清晰嘅方式，比大眾用嚟識別警察嘅學識水平㗎……

無錯，就係「紅膊頭」！

因應過去嘅整體社會學識水平，能夠成功中學畢業，識講幾句英文已經可以喺就業市場搵一份好工，對於要「好天曬、落雨濕」嘅員佐級警察職位，實在難以吸引識英文嘅人入職。亦因為咁，長期以嚟皇家香港警察都會同時招募識英文同唔識英文兩批人。但係話晒香港當時係英國嘅，市面唔少外國人（英國人）需要向警察求助，而且高級警官亦唔少係英國人，點去一眼分辨佢哋識唔識英文？

當時嘅辦法係，只要招募時係明確識英文嘅（例如中學畢業），或者入職前後考過咗政府第四級英文試（係當時共計八級嘅考試中，第四級大概等如中一嘅英文水平，最高嘅第八級等如中五英文水平），會轉戴紅色底嘅警員號碼肩章（即係所謂嘅「紅膊頭」）以作識明，仲會有一筆一次性嘅津貼（錢呀，係錢呀！），而且對於員佐級警員而言，考到第八級英文試，係佢哋獲上級推薦投考督察嘅必要條件，變相以升職作利誘鼓勵員佐級警員去讀書、學英文。

呢套制度，由五、六十年代，一路行到九十年代，直至大約主權移交前後，員佐級警察入職嘅最低要求升左做會考5科及格（包括中、英文）之後，就唔再需要呢一套制度。不過觀乎近年警察嘅學識水平，似乎早已倒退回過去。

今時今日，有無辦法將呢一套重現？有大學學歷嘅就戴「紅膊頭」，無嘅就黑膊。不過老實講，連「警察做野唔洗帶委任證」都講得出，想認佢係唔係真警察都無方法，仲話想認佢有無大學學歷？明顯我諗多咗啦……

（P.S.: 真心覺得舊時代嘅警察型好多！無論制服定制度）