機動戰士的歷史------第一部 UC0079及以前

第二章

人類第一次太空重兵對決︰一年戰爭（UC 0079-0080年）

「見せてもらおうか、連邦軍のモビルスーツの性能とやらを」

シャア・アズナブル（夏亞·阿茲納布爾）

戰爭嘅開始︰

開戰之始︰一週戰爭及不列顛作戰

UC 0079年1月3日朝早7點20分，自護公國發表開戰宣言（人稱：三秒鐘開戰宣言）（謎之音︰咁短嘅……），一年戰爭正式開打。係同一時間，自護軍同步攻擊位於Side1、2、4嘅所有聯邦軍巡邏艦隊及使用NBC（核生化）武器去攻擊上述三個殖民地（注︰雖然去到呢個部分，成個歷史都已經係一個如有雷同實屬不幸嘅虛構歷史。不過喺現實世界中，所謂嘅NBC武器基本上都已經被禁止喺所有戰爭上使用。而整個歷史最早可以追溯至上世紀60年代嘅冷戰時期，因為當時中國及法國各自成功試爆自家制嘅第一枚核彈，引發美蘇兩國擔心將會有更多國家擁有核子武器，所以雙方分別於1965年8月和9月向日內瓦18國裁軍委員會提出一項防止核子武器擴散條約草案。經過幾次修訂後，於1970年3月5日正式生效。之後幾十年間，除咗印度、巴基斯坦、南蘇丹、以色列及朝鮮外，全球各國都紛紛加入。當然，除咗防止核武器嘅擴散同使用之外，聯合國係安理會第1810號決議中表明「不得抵觸或改變《核不擴散條約》、《化學武器公約》及《生物和毒素武器公約》締約國的權利和義務，或者改變國際原子能機構或禁止化學武器組織的責任」。然而，到宇宙世紀UC 0079年，聯合國呢個地球歷史上比國際聯盟更廢嘅機構仲係唔係到，人類仲會唔會咁聽話地去守呢個規矩本身都已經係一個值得討論嘅背景空白。所以呢……自護會用NBC武器都係一件好正常嘅事黎）。結果，喺呢次人類史上第一次於太空戰大規模使用NBC武器嘅情況下，開戰僅僅40小時就已經直接造成28億人死亡（謎之音：會唔會太誇張）。UC 0079年1月4日，自護軍發動第一次不列顛作戰，目的係利用Side 2嘅八號殖民衛星作為一件超大質量彈去直接攻擊聯邦軍總部賈布羅。係期後嘅兩三日，聯邦軍用盡一切可行方法都阻止唔到呢個殖民衛星嘅掉落。結果係1月10日，殖民地跌入大氣層，結構嚴重受損，喺阿拉伯海上空開始分解，因此未能命中賈布羅。而殖民地嘅前端就命中澳洲悉尼，造成澳洲大陸 17% 陸地消失，及後大部分碎片橫灑太平洋。結果，開戰先啱啱一個星期，地球圈總人口嘅30%已經死於戰爭（謎之音：都咪話唔誇張）。

第二個星期︰第二次不列顛作戰及魯姆會戰

話說咁就打咗七日，自護軍可以話係嬴聯邦軍嬴到開巷（謎之音︰廢話，自護軍用有咁多MS大隊而聯邦軍得啲又大又笨重又唔好用嘅宇宙艦隊，唔輸到全炒經已極度好彩）。同時間，係1月11號，Side 6亦發佈咗一份中立宣言，正式代表Side 6喺以後所有戰爭中嘅一個特殊地位，就係不論聯邦定係自護，都可以入嚟Side 6，但前提要封曬所有武器，當中包括MS嘅槍砲（注：封曬所有武器唔係指解除武裝，而係喺進入Side 6時用類似大型膠紙嘅物體封住所有槍炮，離開嗰陣會揻返）。幾日後（1月13號），第二次不列顛作戰正式開打。自護軍方面，分別由宇宙攻擊司令多茲爾·薩比中將率領嘅第一聯合艦隊以及由基絲莉亞·薩比少將率領嘅突擊機動軍艦隊組成，從宇宙要塞所羅門同埋月面基地格拉納達出兵，目標直指位於Side 5嘅魯姆空域，希望再一次送殖民地衛星呢份「大禮」俾聯邦政府。但係，今次聯邦軍嘅反應能力居然高咗。係短短24小時內，雷比爾中將率領嘅聯邦第一聯合艦隊由月神二號向Side 5 出發，希望可以阻止自護軍又一次妄想嘅行為。結果又真係俾佢地趕到，仲可以逼使自護艦隊同佢地混戰。雖則今次聯邦艦隊有傳奇大將雷比爾嘅戰鬥力加乘，但可惜最後打唔夠一日，又一次俾自護軍嘅MS部隊打到半殘，而今戰亦都係馬沙成名嘅一戰（注︰其實佢係一條友打沉咗5隻聯邦嘅艦先有得去拎個封號，軍功呢家野真係好難拎）。

同時間，喺今場戰役出場，隸屬自護軍603測試小隊嘅「巨蟒（Jormungand）」（一款由自護軍自主研發，專門應對無重力空間下嘅艦隊超大型加速實彈砲。而聯邦後來成日動不動就打……唔係，係開一砲嘅殖民衛星砲，有傳係用佢作為原型黎開發）（注︰關於603小隊嘅故事，可以去Google一下「MS IGLOO」，基本上呢套係穿插於整套一年戰爭，由自護軍嘅秘密武器研發小隊603小隊為第一視角，見證咗自護由贏到輸嘅一個過程。中間劇情會有少少催淚，但真係為自護所有黑科技補完應有嘅故事），發射第三炮摧毀一艘麥哲倫級巡洋艦後，炮手亞力山大·海梅上尉戰死沙場，佢嘅戰死亦將眾多提督所喜愛嘅大艦巨砲主義打到體無完膚。從此，MS稱霸各大戰場已無懸念，而各艦隊亦淪為運送及護衛各類型MS嘅大型工具。返到戰場，聯邦軍一次又一次嘅慘敗逼到雷比爾要走佬，但佢極度不幸地喺走佬途中被自護軍旗下嘅黑色三連星俘虜。最後損失超過八成嘅聯邦艦隊，於1月16日清晨開始，所有殘存艦艇開始脫離戰場。去到清晨6點，第二次不列顛作戰正式終止，公國軍各艦隊開始返航。今次戰役戰死20億人以上，當中大多數為Side 5居民，而今次戰役最血腥嘅地方，就係將原本Side 5所在嘅宇宙空間，徹底變成一片暗礁宙域，Side 5亦要係戰後另覓地點重建。言歸正傳，聯邦軍得知雷比爾被俘虜後，於1月23日派出特殊部隊進行營救作戰。1月28日，自護正式透過Side 6對聯邦提出休戰條約，但實際上係作出降伏勸告，呢份所謂嘅條約中最主要係要求承認自護公國嘅獨立自治權及縮減聯邦軍軍備。當然啦，若果雷比爾無比自護俘虜嘅話，聯邦真係not give a damn都似。但依家有人質係對家手上，都好難唔答應自護嘅要求。1月31日，雙方預定於南極簽訂停戰協定之際，雷比爾突然出現。原來佢老人家不單止無死，甚到親身會場發表「自護無兵論」演說，令到聯邦一下子多咗底氣，當場迫自護修改條約內容。最終雙方同意禁用 NBC 兵器（Nuclear、Biological、Chemical）同超大質量彈（殖民衛星墜落等）、禁止攻擊木星運輸船團同月面恆久都市、以及保障俘虜人權等。聯邦呢次大翻身，為自護嘅大敗鋪咗一條平坦大道。戰爭已經打咗1個月，聯邦軍似乎終於瞓醒，佢真正嘅戰爭機器，到依家先正式開始運轉。

地球侵攻作戰

UC 0079年2月，經過幾日嘅徵兵，自護嘅地球攻擊軍正式設立，並開始利用位於月面嘅 Mass Driver（物質運輸用磁力加速器）向地表發出攻擊。3月，係宇宙出世嘅自護地球攻擊軍第一次進入位於大氣層內嘅地球土地。之後嘅幾日，自護軍以中亞為據點，開始以歐洲、中東、北美東西兩岸及大洋洲為目標發動攻擊，同時自護軍嘅資源採掘部隊亦跟隨地球攻擊軍進入大氣層，為佔領區嘅自護軍提供後續補給；另一方面，聯邦軍嘅地面部隊輸得比宇宙軍更慘烈，因為自護當時係連同MS一齊降落到地球上，所以聯邦軍地面部隊嘅火力根本唔夠，只可以被挨打。直到4月，一個聯邦軍史上最機密嘅計劃正無聲無色咁開始推行，佢就係被後世稱為聯邦軍玩MS玩到上一條不歸路嘅「V作戰」計劃（注:「V作戰」計劃其下除咗開發MS之外，仲有專門開發MS專用強襲艦嘅分支。）。UC 0079年4月尾，聯邦軍地面部隊經過多次交手後，終於成功運用由自護軍偷返黎而且為數唔多嘅MS與裝甲組成混編中隊，開始反攻自護軍喺地面上嘅補給站同據點；5月，自護軍宇宙要塞所羅門完成，同時間局地砲擊戰用 MS-06K、水陸兩用 MSM-03同MSM-04 開始配備；11日，隸屬自護軍603測試小隊YMT-05試作機動戰車「戰狼（Hildofr）」，係大氣圈降下運送過程中，遭到被聯邦軍所偷走的MS、裝甲混編中隊襲擊，最終戰果當然係聯邦中隊全滅，戰狼大破，測試駕駛員迪梅契爾·索尼恩少校戰死。今次戰狼大破亦都將戰狼為主嘅MS型戰車嘅開發計劃壽終正寢；6月，自護軍要塞阿·巴瓦·空、所羅門、月面基地格拉納達以及本土防衛網基本完成，代表自護軍開始由攻勢轉入守勢。同時間，人類史上最初嘅新人類實驗所，亦係自護史上最黑暗嘅新人類實驗：佛拉納岡機關，喺基絲莉亞·薩比少將監督下於Side6正式成立。呢個機關就係後來宇宙世紀嘅時代入面，眾多所謂新人類所誕生嘅地方，亦都係自護史上最黑暗嘅一個實驗。至於實驗內容係咩，到依家都無人知。啱啱降落地球嘅自護軍，理所當然係無潛水艦嘅，因此最初編成潛水艦隊嗰陣，所有艦隻都係來自聯邦軍位於加州基地中嘅潛水艇，都咪話唔諷刺；另一邊廂，自護軍自行研發嘅MS 搭載用 U 級潛艦開始生產，以配合早於5月正式執行任務嘅水陸兩用 MSM-03同MSM-04兩款MS。如事者，戰爭已經打咗半年，當自護仲天真咁以為聯邦軍只會靠偷佢地嘅MS黎打仗之時，早喺4月正式決定執行嘅「V作戰」計劃終於開始見到盡頭。7月，聯邦軍MS用光束武器小型化成功，新型MS RX-78-1 Gundam試作一號機於Side 7完成；RX-79計畫正式實行，先行量產型「高達」開始生產（注意︰其實RX-79系列最早係1996年開售嘅OVA《機動戰士GUNDAM 第08MS小隊》出場。但最慘嘅係，如果跟返最初0079成個故事嘅時間線嘅話，聯邦軍係連最基本嘅量產型MS吉姆都未出現。所以，RX-79呢個系列一直都令“軍事迷”嘅高達粉絲不滿同瘋狂攻擊。最後，SUNRISE決定修改歷史，將一年戰爭嘅聯邦MS開發史大改一輪，直接將08MS小隊中出現嘅所有MS都定性為先行量產型MS系列。）另一方面，聯邦軍嘅新型MS專用強襲艦研發都有所突破，新造艦飛馬級強襲揚陸艦白色基地搭載難民即時進入宙域，而白色基地嘅成功，造就一代最傳奇嘅聯邦軍軍官，布拉度·諾亞；至於自護軍，係呢個時候，先叫做正式成立潛水艦隊十支以上，喺大西洋、印度洋、北極海各處戒備，主要用於防備聯邦軍嘅殘存艦隊開展任何奪回軍港嘅作戰。8月，聯邦軍試作型MS於Side 7展開最終測試，同時間北美基地開始開發RX-78-NT1 ALEX。冇錯，就係呢部MS成就咗一個無腦嘅人所謂嘅一世英名，仲可以年年都有人紀念佢（題外話︰時間已經黎到UC 0079年8月，其實呢個就係當年所謂嘅「UC 0080年 口袋裏的戰爭」嘅開始。而作者本人喺翻睇完成個故事之復，變成一個超級反巴尼嘅人。所以會開始見到唔少作者瘋狂鬧佢嘅情節。如果閣下係佢嘅粉絲嘅話，咁就將就睇下啦。）。9月，白色基地朝目標Side 7出發。3日後，啱啱到達目的地嘅白色基地就遇上自護軍特務部隊攻擊，而呢次攻擊亦都開創咗另一個人嘅MS駕駛生涯。冇錯，佢就係大名鼎鼎嘅「人類總是⋯⋯」主角阿寶·尼爾。雖然今次係阿寶第一次揸高達，但係今仗作為史上初次MS對戰，一啲都唔失禮。可惜，原本打算交付俾白色基地嘅聯邦軍MS係每樣3部，當中包括RX-78高達，RX-77鐳射大砲同埋RX-75太空坦克。但經過一輪戰鬥後就只剩每樣一部，呢3部亦都成為白色基地中最經典嘅3部MS；係自護軍偷襲嘅同時，原本白色基地艦長巴奧羅受重傷並不久後傷重死亡，布拉度·諾亞就以少尉官階正式接管艦長一職，開始咗佢同阿寶嘅不正常關係（？）。過咗無耐，時間去到9月尾，白色基地正式朝地球圈出發。UC 0079年10月，聯邦軍嘅MS工廠繼7月完成MS用光束武器小型化後，終於可以火力全開咁大規模量產旗下最經典MS，RGM-79「吉姆」系列。

係呢度，就係時候要解釋一下點解吉姆會有咁多唔同類型嘅分支。//

其實早係UC 0079年7月，聯邦軍地面主力喺初步掌握MS嘅生產能力嘅時候，就已經推行RX-79計畫。呢個生產階段主要都係先行量產型吉姆以及主要喺北美戰場較常見嘅地面型吉姆，用黎對抗早係地面部署大量MS嘅自護軍，以求扭轉局面反敗為勝。去到同年10月，開始生產嘅先係聯邦軍（主要係宇宙軍）量產型MS嘅老祖宗RGM-79吉姆。及後去到一年戰爭嘅末期，吉姆已經出產咗大量專門針對不同任務需求及王牌機師嘅專用機，而堪稱聯邦軍史上最強嘅MS小隊，隸屬聯邦軍第二聯合艦隊旗下，人稱不死身第四小隊，就正正係全員清一色都係用吉姆系列機型。所以，係一年戰爭後，聯邦軍不斷將吉姆系列魔改，直到UC 0096年，都仲可以見到佢地嘅身影。同一時間，自護軍都冇偷懶，佢地終於都成功將MS用光束步槍實用化，成功地將一代名機推上前線：MS-14格魯古古系列。可惜，自護軍直到戰爭結束之時，都未能夠將光束步槍應用到其他MS身上，最後被聯邦軍用龐大嘅光束步槍MS部隊所撃殺。與此同時，自護軍嘅黑暗實驗室，佛拉納岡機構，成功開發試作型精神感應系統。呢套系統就係後黎聯邦軍所謂嘅「T骨架」，但係喺一年戰爭時期，只有自護軍有能力去開發同精神感應系統融合嘅機體。最終因為資源所限，只有兩部能夠出世，一部就係馬沙係一年戰爭中最後嘅坐駕，MSN-02自護號，同埋喺一年戰爭外傳《機動戰士鋼彈 雷霆宙域戰線》（機動戦士ガンダム サンダーボルト、Mobile Suit Gundam Thunderbolt）中作為自護軍王牌機體嘅MS-06R渣古II高機動型“精神感應渣古”（作者愛機之一，以前打機成日用佢）。10月1日，自護軍地球攻擊司令官加曼·薩比喺馬沙嘅“協助”之下，成功地將被逼降於紐約後又重新起飛嘅白色基地擊殺。今次其實係馬沙第一次向薩比家復仇，因為公王當年就係殺佢老頭子嘅幕後黑手。10月6日，加曼國葬典禮舉行，基連·薩比發表全球演說，指出公國雖然只有聯邦軍30分之1嘅實力同資源，但佢地係正義嘅一方所以最終必勝等等。不過呢一堆講話入面，已經明確搬出咗一個事實，自護軍最終都係要輸。始終打仗唔係靠幾百次演說同埋士氣就可以成事，而係要靠錢同資源。面對龐大嘅聯邦軍，自護頂到一年先全炒其實已經好勁。若果聯邦係開戰之初已經有MS同自護對抗嘅話，作者深信自護最多只可以捱到半年。一年戰爭中甚少有人提及嘅東南亞戰線（08MS小隊）正式開打，藍巴·拉爾隊喺國葬典禮嘅同一日降落地球。10月中旬，聯邦軍各軍團開始集結準備決戰。而喺10月16日，史上第一台搭載賽可謬系統（又稱精神感應系統）嘅新人類專用試作機體MS-06Z Z-Zaku喺佛拉納岡機構完成製作，代表自護嘅黑科技已經可以運用喺MS身上，然而呢部機只係用嚟收集實驗數據，冇辦法運用喺實戰上。10月中下旬，聯邦軍派出08MS小隊試圖捕獲自護喺地球部隊嘅特殊MA，阿布薩拉斯。08MS小隊潛入自護軍演習場，但行動失敗。而小隊長斯羅·亞瑪達一時失蹤，有傳佢同自護軍機師愛娜·沙哈蓮嘅愛情就係喺呢個時候開展嘅。

時間嚟到最後兩個月，聯邦軍嘅反攻力量日漸強大，開始將自護軍逼到節節敗退。11月6日，當年成功俘虜雷比爾嘅自護軍特務小隊，「黑色三連星」，為咗支援馬·古比而降落地球，點知連休息嘅時間都冇，聯邦軍就發動咗敖德薩作戰。結果自護軍大敗，馬·古比搭乘桑吉巴爾級戰艦走佬返宇宙，「黑色三連星」亦全數戰死。及後自護軍於地球發動最後兩場戰役，貝爾法斯特同賈布羅戰役，亦大敗而歸。除咗直接令自護地面軍戰力衰退，亦逼使自護軍召回軍力集中防守宇宙戰線。

聯邦軍反攻開始，戰爭尾聲

UC 0079年12月，作為一年戰爭中聯邦軍最聲勢浩大嘅一個月，一連串反擊、掃蕩同埋攻擊計劃將自護軍推入必死嘅境地。12月2日，白色基地經過幾個月大大小小嘅戰鬥後，終於喺賈布羅編成「第13獨立部隊」。隨後，潛伏地球嘅自護軍特務部隊「獨眼巨人隊」襲擊聯邦北極基地，試圖搶奪聯邦新型MS RX-78 NT-1。冇錯，自護軍今次嘅行動可謂開啟咗自護搶聯邦MS嘅「優良傳統」（謎之音：搶親多數都係二號機）。及後，聯邦軍為保NT-1可以交付到白色基地，於12月11日就將NT-1運抵Side 6。隨後日子，「獨眼巨人隊」多次開展NT-1搶奪行動，但幾乎所有機師都被聯邦軍嘅女機師姬絲汀娜·麥堅治以NT-1擊殺。12月24日平安夜，兩場戰鬥同時發生。一場位於Side 5被放棄嘅殖民衛星德克薩斯殖民地，主角當然係我地嘅好基友馬沙同阿寶啦；另一邊廂，聯邦軍發動所羅門戰役，目的只有一個，攻下自護軍宇宙要塞所羅門，打開攻打自護軍最後軍事據點阿·巴瓦·空嘅大門。今場戰役又係一場一日戰役，要塞統帥多茲爾·薩比一早下令殘存部隊撤退，剩返自己一個駕駛MA-08 Big-Zam孤軍作戰。最後，佢都成為阿寶劍下唔知第幾個機師亡魂。一日後，12月25日，自護軍「獨眼巨人隊」嘅死剩種巴尼，佢為咗偷高達定唔知為咗自護嘅「榮光」，獨自發動聖誕節作戰（クリスマス作戦）。最後，佢都死係姬絲汀娜嘅刀下，但佢亦令到NT-1大破。自此，到咗今時今日，都仲有好多人會去紀念佢。其實呢個作戰，甚至巴尼呢個人，係作者眼中同依家某國嘅領導人係無分別。自己作為「獨眼巨人隊」成員，見證自己所有嘅頂頭上司都紛紛死於NT-1嘅手中，都唔肯放棄。大丈夫來日方長，君子報仇十年未晚，明知自己嘅實力根本都打唔贏一個女人嘅時候，點解仲唔收兵重建「獨眼巨人隊」？仲要傻下傻下咁自己一個人，英雄主義上腦咁去單挑一個殺曬你上司嘅女人。呢種人根本唔值得被任何人去紀念，甚至應該喺每年聖誕節都要公開咁批鬥佢。打仗講求嘅係團隊精神，軍事上各種不同兵力嘅協調同埋互相支援，而唔係單兵嘅個人英雄主義。你巴尼唔係馬沙，就算係馬沙都有好幾次都被打到落荒而逃。當身為自護軍皇牌機師嘅馬沙都有好幾次差啲死係阿寶手上嘅時候，你憑咩覺得自己可以打得贏，唔通大叫一聲「SIEG ZEON」就會打得過？係自護軍臨近大敗嘅時候，多一部渣古就係多一部嘅戰力。呢個傻仔明知無後援無救兵都要同個接近ACE級嘅人去對打，同送死有咩分別？所以，唔好再提咩巴尼紀念日，應該要改成批鬥巴尼日，要所有人好好認清佢係俾一個女人大炒嘅事實，而唔再係歌頌佢嘅個人英雄主義。

離UC 0079年完結剩返3日，聯邦軍於12月29日決定發動「星一號作戰」，直接進攻阿·巴瓦·空。開戰前夕嘅12月30日，公王同聯邦第三艦隊接觸。正當佢同雷比爾交涉之時，自護軍嘅秘密武器太陽光學系統突然直接攻擊公王同雷比爾嘅所在地。兩人當場死亡，聯邦雷比爾艦隊 1/3 艦艇沈沒。冇錯，下令開砲嘅就係公王嘅不孝子基連·薩比，真係難聽啲講句，咁都做得出嘅人居然仲有面喺全體將士面前發表決戰演說。最終，UC 0079年12月31日，聯邦軍傾全軍之力攻打自護軍嘅最後要塞阿·巴瓦·空。12月31日早上9點25分，不惜殺父嘅基連·薩比喺要塞司令室被佢個妹基絲莉亞·薩比一槍送佢去見佢老頭子公王。中午時分，艾基爾・達拉斯上校率殘餘艦隊脫出，當中包括自護軍特殊部隊603小隊，直飛小行星阿克西斯基地。而今次嘅艦隊脫出亦為0083年嘅戰爭埋下咗另一個惡果。

最終，UC 0079年12月31日下午6點，自護透過Side 6向聯邦政府發出終戰協定。UC 0080年1月1日，自護公國投降並改制共和。聯邦政府同自護共和國喺月面格拉納達市簽定終戰協定，一年戰爭正式結束。自護軍嘅一部分人員喺原來嘅領導人哈曼·嘉（マハラジャ・カーン）嘅指揮下，向小行星阿克西斯前去。而唔願意前往阿克西斯嘅自護殘黨，喺達拉斯嘅召集下組成達拉斯艦隊。戰爭，仲未完結。

後記

UC 0079年嘅一年戰爭係人類歷史上真正嘅第一次宇宙重兵大對決。雖然呢場戰爭本應可以唔洗打，但對一個腐化嘅中央政府同埋一個被軍國主義沖昏咗頭腦嘅地方政府黎講，呢場大戰最終都要開打。地球聯邦設立殖民衛星嘅本意就係為咗拯救地球，但係一連串喺錯誤時間出現嘅人物所制定嘅錯誤嘅政策。意識形態嘅衝突最終都演變成一場戰爭，只不過政府嘅外交能力同埋手腕先係化解危機嘅最好方法。一但雙方都爭持不下，戰爭就係唯一嘅手段。呢場大戰，至少直接或間接咁殺死地球圈超過一半嘅總人口。而呢場大戰嘅後遺症係，地球聯邦政府對新人類以及自護主義嘅恐懼日漸加深。唔肯正面面對恐懼嘅最終結局，就係聯邦政府嘅徹底解散，不過呢個都係百幾年後嘅事了。總之，一年戰爭不但正式標誌聯邦同自護嘅永遠對立，亦都為聯邦玩壞MS嘅道路上，打開咗潘朵拉盒子，同時地獄之門亦向聯邦政府中門大開（注︰作者其實避開左某個人無寫出黎，心水清嘅應該知係邊個）。

機動戰士的歷史------第一部 UC0079及以前

《從Side 3獨立宣言到一年戰爭》完