Unsaturated的穆斯林男人

我係一個正修讀cosmetic science 的文科生，每次睇 reading 時，好多超基本的理科概念我都唔明白。每次問我的理科老公，佢總係用D好無厘頭的方法解釋俾我知。例如解釋 “saturated” 同 “unsaturated” 時，佢會以穆斯林男人為例子 :

有兩個老婆的穆斯林男人，仲可以娶多兩個 = unsaturated ; 已經娶左四個老婆的穆斯林男人，quota full左，唔可以再娶 = saturated

好無聊，但聽完又明明地咁...... 不過呢一篇唔係想講我地兩夫婦之間的無聊野，而係想講下穆斯林男人的 “saturation”

之前馬拉有篇關於印尼的報導，一名印尼婦女因不滿丈夫娶好多老婆，所以對丈夫萌生殺意，點知陰差陽錯毒死左個奶奶。留言大都係指責這是三妻四妄的後果。其實點解穆斯林可以俾男人娶四個老婆呢?

我的印尼文老師是一名24歲穆斯林大男孩。一次練習印尼文 “How many” (Berapa) 的會話時，我就衰衰地用印尼文作左句 “how many wife you can have?”

老師笑笑口答 :「一個呀! 」一個? 你係Muslim喎，唔係四個咩?

“I don’t know why people say so, Bu (Ms).” 老師攤攤手說。佢用簡單英語解釋，根據佢認知，因為寡婦係以前年代無錢無地位，好難生存，基本上係死路一條。穆罕默德娶寡婦係本住「救人」的心，所以呢個法律主旨係在於「幫助別人」，而來到現代幫助孤兒寡婦已經有好多方法，加上如果只係為左貪戀、移情或者為左留後而娶多過一個老婆，其實都有違法律本身的精神。

之前睇過一D印尼街頭訪問，好多後生穆斯林男女都唔贊成自己或者另一半娶多過一個老婆 (當然，有男生係老婆旁邊接受訪問可能都係原因.....) 。咁點解仍然有咁多穆斯林男人走去娶幾個老婆呢? 我的純情系印尼老師，只能夠話佢都唔明白點解D人咁做，因為法律唔係咁意思。

我點點頭。作為一個香港人，尤其是係現今的香港，又點會唔明白「法律」呢樣野，係幾咁容易被人利用來達到自私甚至根本野蠻的目的呀。

從來「依法管治」的 backbone 係要有check and balance的民主制度，如果唔係成日話自己「依法管治」根本就係廢話。你睇，D極權國家安裝左舉手機器 ，法律又好憲法又好，都可以輕鬆「完善」過來了。

一日係我唔好，以前成日將「立法會」口快快說錯了做「垃圾會」。可能唔小心咀咒左佢，咒語就係咁樣靈驗左.....

Anyway，我扯遠了。附上上述案中的警察與涉事印尼婦人、以及其「兇器」(有毒的煮食鍋) 的大合照......點解拉個疑犯都要大合照？本地人話，呢啲係印尼警察嘅norm喎

哦，唔文明咩? 柒咩? 香港有D議員同官係醫院「不准拍照」牌前合照，仲有執葉律師係法庭範圍內selfie威威，其實咪差唔多。人比人，比死人咩。

相片及新聞來源: https://www.sinchew.com.my/content/content_2440711.html

文中提及的街頭訪問: https://www.youtube.com/watch?v=9IdJLzd85jA