山水之約｜最喜愛的香港山嶺 – 馬鞍山（廣東話)

香港嘅山唔高，頂盡都係得一千米。
因為佢有長長嘅海岸線同埋唔同嘅地質覆蓋，山嶺變化多端迷人。
朋友問我最愛邊座山，我嘅選擇唔係香港之巔大帽山，又唔係香港精神嘅代表獅子山。
有人鍾情於大東山爛頭營嘅蘇格蘭高地風情，亦有人醉心於太平山頂俯瞰維多利亞港嘅璀璨繁華。

而我嘅心頭好係馬鞍山。

地理

馬鞍山楝响香港東邊，比沙田同西貢夾住。
主峰海拔７０２米，同牛押山由一個微微凹嘅山脊相連，因為外型似馬鞍而得名；同其他山峰聚埋，成為一個山系。

呢頭最高就係馬鞍山，環迴３６０度無遮無擋。
北望八仙嶺，梧桐山；東面有西貢諸峰例如石屋山,蚺蛇尖。
南面可以望到九龍群山及至港島部份崚線，西面由一眾圍繞沙田巿鎮嘅眾山例如針山同大帽山。

佢嘅海岸線亦都非常優美，從沙田巿鎮嘅城門河流出吐露港；再遠一尐嘅赤門海峽，一脈相承。
尤其响陽光映照之下嘅企嶺下海，一片寧謐寂靜。
東面嘅西貢海又經常千帆並舉，靜中帶旺。

風貌

除咗高山同海岸線，佢可以睇到昂平高原(拜託，400米海拔對於香港嚟講已經係高原㗎嘞，咪奢求)。
你好彩尐仲會睇到班人＂飛上天上＂，因為喱度係滑翔傘嘅蒲點。
馬大石澗源於馬鞍山，中游亦有爆紅嘅英雄瀑，絕對係渡過熱辣辣嘅夏天嘅消暑之選。
附近嘅鹿巢山亦都有全港最大嘅石林，保證你對各種多變嘅地貌睇到Ｏ咀。

杜鵑花

香港有六種原生野生杜鵑花，分別係香港杜鵑，華麗杜鵑，毛葉杜鵑，紅杜鵑，羊角杜鵑同埋南華杜鵑。
馬鞍山嘅土壤偏酸性，山勢陡峭，無乜人搞，有利野生杜鵑花生長。
喱個山區竟然可以培育到全部六種，所以每年春季，沾寒沾凍濛查查，依然一大班友排住隊上嚟睇。

有尐响路邊矮得得嘅灌木入面爭奇鬥艷，又有尐聚咗响高大喬木上面花枝招展，亦有尐响峭壁上絕處逢生。本土物種受到外來物種嘅競爭，要生存，唔容易。

人文

馬鞍山係香港唯一難得一見嘅工業礦山，山腰度有一個荒廢咗嘅鐡礦場，喺二十世紀四十至七十年代有興盛嘅採礦業務，產品曾經遠銷至日本。
山中村落曾經聚居多達五千名礦工同埋眷屬。
宜家部分村落仍然有人居住，亦都有一間鞍山探索館導賞巿民認識當年嘅種種歷史。
而當中一尐地底礦洞雖然遭到政府圍封，仍然有唔少人入去探險。
其實政府根本漠視喱項重大歷史遺址，令到大家企晒响度。
而喺露天礦場外圍，依然可以搵到唔少嘅鐡礦石，我亦都好鍾意帶朋友嚟參觀同埋碰運氣。
唔該記住山野不留痕外，亦都唔好帶走一花一石。

馬鞍山能夠成為心中最愛，係因為山作為唔同經歷嘅載體，盛滿我深厚嘅情感。

成長

馬鞍山上遠眺嘅風景，無論係沙田巿鎮，中文大學，吐露港，烏溪沙海岸，定係大埔巿鎮,我成世根本就响度住啦，返學啦，玩啦。
企响度就望到鄉下，每個地方都有我嘅腳毛，臭汗同故事。

元旦行山

千禧年後無幾耐，每年元旦都會同朋友行山鬆下。
第一年就係爬馬鞍山，取道傳統嘅上山路線，由吊手岩一路撐到彎曲山，返番馬鞍山村，途中仲搵下啲奇石。
之後接近廿年，人事唔同晒，香港變天，唯獨此山不變。

毅行者

有一年參加毅行者(香港經典嘅慈善跑行山活動，要响48個鐘內完成100公里嘅麥里浩徑，通晒頂咁由西貢北潭涌行到元朗大棠)，中晒暑咁操練。
响山腳嘅麥徑第四段，瀨晒野，腳都抬唔起：每上10級樓梯就要坐低抖10分鐘，好彩隊友無詐形。
Ｄ-ｄａｙ果日，摸黑頂住凛凛寒風步過彎曲山，四圍響起直昇機嘅盤旋聲，仲有人吱吱吟話有人誤墮山崖。
喱種經歷好似死過返生，邊會唔記得呢。

釋放

果年主子大病，整整兩個幾無抖過。
終於等到主子有尐起色，可以安排行程小休。
揀咗兩條無乜人嘅路線，登高遠望果一片色彩繽紛嘅企嶺下海，即刻覺得舒一口悶氣，等我有精神返屋企搏殺。

雲海夕照

某年帶住西人同事望山望海，巧遇冷鋒襲港。
上山時天朗氣清，睇住雲霧由西貢海上慢慢漂過嚟，再昇上昂平高原，再冚過去沙田巿鎮。
仲要撞正日落西山，睇到大家依哇鬼叫。

獨行觀日出

又一年心血來潮，約埋朋友到昂平宿一宵睇日出。
無厘頭搞到要獨自夜行：响山腳同村狗傾咗一陣先過到路；慢慢行又停响路間中靜靜睇星；營地前比幾到十隻飢餓鬼陀地牛睥實。
就算唔能夠睇住太陽由海平面凸出嚟，不過攤响清新嘅草地上面，懶洋洋咁嘆世界，曬太陽。
成晚嘅經驗幾咁舒暢，難忘。

我曾經陪埋唔同嘅朋友，分享我嘅所愛。
直到宜家我都不時盤算點樣調整行程，希望帶大家行喱座山嘅唔同路線。
可惜齋諗，時間同行動力太少。
要把握時間，做野嘞！