如果要將第三顆未命名一等星命名的話，我會命她做：戀愛小行星

一講起芳文社，相信大家一定會第一時間諗起一大班萌妹子係虛度日常；咁一講起動漫工房，相信大家一定會第一時間諗起一大班萌妹子係度百合。如果兩間公司合作製作動漫，當中最出名嘅梗係New Game。如果話New Game係職場廢萌日常番，咁恋する小惑星（下稱：戀愛小行星）可以話係高中廢萌日常番。

戀愛小行星講述，女主角之一木之幡米菈在小時候參加露營時遇到了一位年紀相仿的男孩，並與他在觀察星空時做下了約定，要找到新的小行星並以男孩的名字取名（其實呢啲嘢你自己上維基百科都睇到⋯⋯咁我就梗係唔講呢啲啦。）

作為一個動畫黨，睇呢套之前，梗係無補返原作先。當初會追呢套，梗係、絕對唔係因為芳文社同百合工房合作（謎之音：Ao好可愛）Www

一開始睇，頭果幾分鐘，點解會有男人出現架？我明明應該係睇到一大班可愛萌妹子，點解會有異性架？媽呀，我不能接受！當然啦，之後好快講返佢係女性黎，只係個名同埋嗰陣相遇時裝扮好似男性。

可能因為中學時期我主修係地理，雖然最後係考到5**，（不過最後因為某啲原因所以選擇咗出嚟做嘢）所以我第一次見到呢套介紹嘅時候其實我係好有興趣，加上因為用天文同地理做題材嘅動畫真係少之又少。正所謂：上至天文，下至地理，所以睇完一集之後我對呢一套番其實係好有興趣，好有衝動想追落去，能夠將一樣咁學術性嘅事用咁輕鬆嘅方法介紹嘅時候其實都係一件幾好嘅事。

雖然每一集嘅推進都可以話係好輕鬆，完全放空個腦睇都無問題，不過呢個我諗就係芳文社同百合工房合作成功嘅地方，放工、放學之後俾你輕輕鬆鬆抖下，唔會有啲咩異世界爭奪，更加唔會有啲咩世界大戰毁滅地球之類，完全係心靈雞湯，完全可以化解一日嘅疲勞（呢個世界欠芳文社一個諾貝爾和平獎）

第六集之後有一集嘅總集篇總結第一至第六集，咁我亦都趁嗰個空檔走去補返原本個漫畫，睇完之後發現其實動畫個時間表上推進係有啲怪，中間有啲重要嘅嘢或者好多學術性嘅嘢都係只係輕輕帶過甚至無講，所以其實動畫睇落去有啲怪係正常，如果有機會，真係值得花少少時間去睇返漫畫原作。

第一至第六集因為中間牽涉太多學術嘅嘢，我覺得如果我講落去應該會好多人咁上一頁離開，所以就唔講（雖然鈴完全係用嚟打醬油，不過每一次有佢出場我都覺得好好笑）

第八集結尾講到Ao因為屋企理由要搬家，之後應該會成為成套漫畫又好動畫都好嘅轉折點，但係好遺憾動畫只係好表面帶過。原作漫畫佢呢一部份其實真係寫得好好，嗰種細膩嘅人設同埋嗰種起承轉合解決問題嘅方法，其實就真係已經跨越佢哋搵唔搵小行星個重點。Ao用左咁耐時間終於可以同米拉重遇，但只係過咗一年之後就要分開，佢唔想面對嗰種唔想分開嘅心情，一直收收埋埋，一直同身邊嘅人講無事，但自己一早知道只是扮出黎，唔想身邊嘅朋友擔心，其實呢一部份真係好容易令人身同感受，最少我係。

雖然之後Ao 同米拉順利同居，但係中間經歷嘅嘢其實真係好值得令人反思：子女沒有表達自己嘅意思，無論仔女點樣任性，都冇辦法改變父母嘅情況？父母一直為仔女準備最好嘅環境，但係如果仔女一直掙扎，應該順佢哋意定係繼續一意孤行？好慶幸我係一個屋企唔會點理我嘅環境長大，所以佢呢個問題係我屋企係會選擇比我自己面對自己解決；反觀而家香港好多新一輩家長，乜都要管佢哋，甚至乎連星期六、日嘅休息時間都安排晒佢哋去晒唔同嘅興趣班補習班嘅時候，先唔好話歡樂同想唔想，而係佢哋連休息嘅時間都無，咁樣真係好咩？喺戀愛小行星入邊，Ao選擇咗寧願離開父母都唔想同米拉分開，咁樣正正代表父母係適當嘅時候亦都應該學識放手，但香港啲家長好似覺得一放手佢哋就會誤入歧途，甚至會因為好少一兩個興趣班而影響將來，搞到啲仔女連掙扎都唔敢。正如戀愛小行星，你想去河邊燒嘢食執石頭或者夜晚去觀星？發少陣夢啦你。

要獲得父母認同係一件極度困難嘅事，但係如果唔試過，又點知會成功定係失敗？但係如果你連試嘅勇氣都無，咁樣有乜意義？父母連你點樣嘅心意都唔知嘅時候，又點會知道你諗緊乜。喺原作漫畫中，Ao努力踏出第一步，雖然係果一刻佢都唔知道結果會係點，成功失敗都未知，但係起碼佢肯踏出第一步，起碼肯去嘗試。雖然最後都係成功（如果唔成功我諗成個故事應該會完結或者我會燒書），但Ao、米拉、鈴，甚至乎兩邊嘅家長，其實都係喺度改變緊。嚟到呢一度，其實我諗佢兩個搵唔搵到小行星已經開始唔係咁重要，而係佢哋點樣一齊面對將來先至係最重要。我諗可能連你睇你都覺得要搵到小行星係絕對無可能，不過更加令人值得反思嘅係，夢想總係不切實際，但係如果有機會俾你實現夢想，就算周圍嘅人反對你都好，你應唔應該堅持呢一個機會，捉緊機會實現夢想，因為可能過咗呢次機會就以後都無機會，坦率地表露自己的感情，才能順利成章做出行動和決策。

另外，主題曲搵咗東山嚟唱（東山大法好），真係幾好聽。不過我要講唔係佢唱得幾好，而係首主題曲啲詞其實真係寫得好好，細膩每一句歌詞之後你都會發現成首歌所有歌詞其實唔單止喺度講點樣搵小行星，而係點樣去面對點樣嘅事。當中有一句：見たことのないもの見つけてゆきたいな ，正如Ao最後都係選擇咗同米拉同居，而選擇唔同父母一齊搬屋；或者再後少少原作漫畫講到小行星尋找活動，米拉贏咗參加資格但Ao輸咗。佢兩個嗰轉變其實同開頭真係差好遠，無論是挫折或者失落嘅時候，Ao由原本好怕同人溝通變到有勇氣去同人講出自己嘅目標；米拉則堅持自己夢想，呢個就係佢兩個互相好好支持對方嘅例子，呢個亦都係要一點一滴累積先會明白嘅事。人生失落嘅事總係十常八九，所以身邊嘅人支持先係最重要。

抱持遠大目標和夢想嘅兩個人，佢哋選擇咗自己將來嘅步伐，咁你呢？

最後最後，希望大家可以按五下拍手，作為支持我創作的原動力（土下座