宣道同學起來！
「船到痛鶴氣LOI！」
大家立定心志！努力學業，充實自己，聖經訓言常記。《宣道小學校歌》
當此惡勢力橫行嘅時間，等我地嚟重溫一個小學時學過嘅聖經故事，充實下自己啦。老老實實，學校就嚟連呢啲聖經故仔都俾人禁埋，冇得聽㗎喇。
話說有位古時有個巴比倫王名叫尼布甲尼撒，係一個好巴閉嘅王帝。有幾巴閉？有次佢叫人幫自己整咗個成八層樓咁高嘅巨大黃金像，然後叫齊政府入面啲奴才包括首長、太監、信差、司局長、議員、師爺、各級官員等等出嚟，可能都包括埋啲宗教領袖同老師呀果啲啦，總之要冚世界一聽到国歌奏起就立即要俯伏向金像下跪以表忠誠，同而家見到枝咁核突嘅乜乜旗要立正差唔多啦。佢仲立左條宇宙大法，任何人如果唔跪，就要掟落火坑，「依法」懲處咁話。
大帝一吹雞，全人類跪低；點知但以理有三個 friend 偏偏好硬頸唔肯跪，挺直腰骨楝喺度，因為佢地只會向自己所相信嘅神下跪咁話。呢個時候有啲藍絲家長就爭住走出嚟篤灰，同大帝講：「吾王萬歲！我王講過話一聽見国歌響起，無論做緊乜都要向住你個金像跪低，凡唔肯跪嘅就要動用宇宙大法定罪；偏偏有幾個猶大人唔放吾王喺眼內，死都唔肯跪喎！嗱，就係佢地三個！夠膽唔聽你枝笛，唔信你果套，簡直當你冇到！一定要將佢地依法處置，掟落火坑，殺一儆百！」
大帝知道後梗係嬲到震，竟然有人膽敢挑戰祖国嘅權威？於是叫咗佢地三個人嚟再問一次：「你地究竟跪唔跪？最後機會。如果死都唔聽話，唔好怪我掟你地落火坑咧。」點知呢三條友竟然仲寸寸貢咁答：「我地做乜要答你呢啲廢問題？你鍾意點樣由得你，就算你掟我地落火坑，我地嘅神都會救番我哋出嚟。」
「但係就算我地嘅神唔嚟救我地，你都應該知道，我地唔會跟住你指鹿為馬，亦都唔會聽你枝笛！慳啲啦你！」
大帝見佢地唔合作，仲咁寸咀，嬲到震啦顏面何存呀？於是佢叫人將個火坑加熱多七倍，驚死燒佢地唔死，然後綁起呢三個唔識時務嘅真猶大人再踢入火坑。呢個時候奇怪嘅事發生左，就係佢地三個竟然燒唔著（？！），個火坑裡面仲好似有第四個人喺度同佢地遊花園，唔通係天使嚟？！大帝走近個火坑望望下，覺得唔對路，始終佢都驚天堂唔留位俾佢㗎嘛！於是佢叫返果三個真猶大人出嚟，仲轉駄話佢地三個嘅神先係真正嘅神添。
呢個故事教訓我地，現實中雖然果啲唔信神嘅人好多時都作威作福，但做人都應該要俾啲腰骨，有果句講果句，堅持唔好做果啲違背良心嘅事表忠。就算面對要俾人踢落火坑嘅下場，都唔應該為咗生存而輕易放棄做人嘅原則同尊嚴，指鹿為馬。
各位宣道嘅同學仔，師長講嘅故仔真係有啲道理㗎。
喜欢我的作品吗？别忘了给予支持与赞赏，让我知道在创作的路上有你陪伴，一起延续这份热忱！
